Nuummi Demokraatit siulittaasumik qinerserusupput
Immikkoortortaqarfiup taamaalilluni akerlilerpaa, Per Berthelsenimut unammillertoq, Jens B. Frederiksen, ilaasortanik qinersisitsinissamut akerliusoq, partiillu malittarisassai malillugit siulittaasup ataatsimeersuartunit qinerneqarnissaa kissaatigalugu.
- Taasisitsinermi taama pingaaruteqartigisumi, tassa Per Berthelsenip siulittaasutut ingerlaqqinnissaa pineqartillugu minnerpaamik kikkut tamat oqartussaanerat malillugu ilaasortat akuutinneqartariaqarput. Taakkumi tassaammata partiip tunuliaqutigisai, Svend Svendsen Nuummi Demokraatit siulittaasuat oqarpoq.
Partiip immikkoortortaqarfiata, juulip arfineq pingajuanni immikkut ittumik ataatsimeersuarnissamut, malittarisassanut allannguutissamik nassiussisimavoq, siulittaasup ilaasortanit qinerneqartalernissaa siunnersuutigalugu.
Nuummi Demokraatit immikkoortortaata partiip immikkoortortaqarfii kajumissaarpai ilaasortat siulittaasumik qinersitinneqarnissaannik piumasaqaqqullugit, qinersinerullu inernera akuereqqullugu.
