Nuummi coronamik misissuisarfimmik nutaamik Inussivimmi ammaasoqassaaq
Maanna oqartussaasut nunatsinni illoqarfiit pingaarnersaanni innuttaasut pitsaanerusumik malinnaaffigisinnaajumallugit misissortittarfinnik annertusaapput, ullunimi makkunani coronamut misissortinniarlutik utaqqisorpassuupput.
Siullermik maannakkut misissuiffiup, kalaalimineerniarfiusimasup silataani tupersuarmik nappaaniarput, misissortinniarlutik utaqqisorpassuit atugassarititaat pitsanngorsarniarlugit.
AAMMA ATUARUK Corona pillugu ullumikkut kisitsisit: Tunillatsissimasut nutaat 12-it
Oktobarip qaammataata aallartisimalernerani misissuisarfik Inussivimmut nuunneqassasoq, Naalakkersuisut tusagassiuutinut nalunaaruteqarlutik taama paasissutissiipput.
Tamannalu Peqqinnissamut Naalakkersuisumut Kirsten L. Fenckerimut nuannaarutaavoq
- Ulluni makkunani inuit amerlasuut cafénut assigisaanullu isersinnaaniassagamik misissortipput, taamaattumillu misissortinnissamut pisariaqartitsineq annertuvoq. Tupersualiinikkut misissuisarfimmut utaqqisunut atugassarititaasut pitsanngorsassavagut kiisalu oktoberip sisamaani misissuisarfik nuunneqarpat misissugassat amerlissapput Kirsten Fencker, tusagassiuutinut nalunaarummi taama oqarpoq, imalu nangilluni, - Naatsorsuutigaarput misissortinnissamut utaqqisarnerup sivikillineranik pitsanngorneranillu kinguneqassasoq, taanna taama oqarpoq.
Tunillatsissimasunik ujartuisut amerlanerulissapput
Tunillatsissimasunik taakkualu qanillisimasaannik ujartuisartunik amerlanerusunik oqartussaasut maanna suliniuteqarput.
Taakkua saniatigut naalakkersuisut qulakkeerlugu oqaatigaat, amerlanerit akiuussuserneqarnissaat tamakkiisumillu akiuussuserneqarnissaq pingaaruteqarmat.
Inuiaqatigiit killilersuinertaqanngitsumik ingerlaqqinnissaannik qulakkeerinninnissamut akiussuserneqarnissaq pingaaruteqarnerpaajuvoq.
AAMMA ATUARUK Naalakkersuisoq: Nuummi nutaanik killilersuisoqassanngilaq – misissuisarfilli nuunneqarsinnaavoq
Akiuussutissamik kapitinnissamut suliniuteqarnerit, misissuinerit aamma tunillatsissimasunik ujartuinerit taamaasillutik annertuumik pingaartinneqarput.
- Anguniagaraarput Peqqinnissaqarfiup ima artukkerneqannginnissaa allaat perulullutik napparsimasut isumagineqarsinnaajunnaarlutik, tamanna ilutigalugu anguniagaraarputtaaq inuiaqatigiinni pissutsit ingerlatiinnarneqarnissaat, Kirsten Fencker taama oqarpoq imalu itisiliilluni:
- Nuummi maannakkorpiaq allanut sanilliullugu annertuumik tunillaassuuttoqaraluartoq, napparsimavimmi uninngasoqanngilaq. Taamaattumik killilersuinerit annertusarnerannut sanilliullugu akiuussusersuinermut, misissuisarnermut aamma tuniluunnermik ujartuinernut annertuumik aningaasaliinissaq toqqarsimavarput, Kirsten Fencker oqarpoq.