Nuummi borgmesterip umiarsualiviup Qeqertanut nuunnissaa orniginartinneruaa
Nuummi borgmesterip Agnethe Davidsenip Nuummi umiarsualiviup Qeqertanut nuunnissaa orniginartinneruaa.
Kalaallit Nunaanni umiarsualiviit aqqanillit annertusarneqarnissaannut nassuiaat sisamanngormat Ineqarnermut Attaveqarnermullu Pisortaqarfimmit saqqummiunneqarpoq.
Nuup Kommuniata kissaatigineruaa periarfissap anginerusup 430 mio. koruuninik nalillip toqqarneqarnissaa, tamaaliornikkummi siunissami periarfissat amerlanerusut ammaanneqassammata.
- Qeqertami umiarsualiviliortoqarnissaa periarfissaqarnerummat uagut kissaatiginerusimavarput, siunissamilu ukiorpassuarni piusinnaanera imminullu akilersinnaanerunissaa eqqarsaatigalugu. Kommunalbestyrelsemi marsip 27-iani taanna oqaluuserivarput, kommunalbestyrelsillu aalajangivinnissaanut massakkut sulisugut suliaqarput inassuteqaateqassallutillu kommunalbestyrelsip ataatsimiinnissaanut. Kommunalbestyrelsillu tamarmi Qeqertani umiarsuaveqalernissaa isumaqatigiissutigissagunikku, taannaassaaq Namminersornerullutik Oqartussanut isumaqatiginninniassutigisassarput, Agnethe Davidsen oqarpoq.
Agnethe Davidsen Nuummi borgmesteriuinnanngilaq, aammali inatsisartuni ineqarnermut attaqaveqarnermullu ataatsimiisitaliami ilaasortaalluni.
