Nuummi biilertut politiinit mianersoqquneqarput
Nuummi blok 4-p 5-illu akornanni, pisuinnarnit ikaarfigineqartartukkut ikaalerluni arnaq unnuaq biilinit aportippoq. Nuummi politiit taama paasissutissiipput.
Allattoq Elisa Isaksen
januaarip 30-at 2010 16:56
Unnuaq ataatsip missaani aporsineq pivoq. Biilip igalaava siorleq aporsinermi aserorneqarpoq arnarlu aporneqartoq Dronning Ingridip napparsimmavissuani unnuisinneqarpoq misissorneqarlunilu.
Biilertoq uneriataarsinnaasimanngilaq, maannalu aqqusinermi pissutsit naapertorlugit biilersimanngitsutut pasineqarluni.
Biilertut aqqusinermi pissutsit naapertorlugit ingerlaniartaqqullugit, Nuummi politiinit innersuussutigineqarpoq.
- Siallerpoq, asfaltillu biilerfiginissaa mianersornaqaluni, aamma aputeqannginnera taarpallaarneralu pissutigalugit inuit takujuminaallutik, Nuummi politiit taama mianersoqqusipput.
Nuummi politiit aamma oqaatigaat illoqarfimmi unnuaq aalakoortoqarsimaqisoq annerusumilli eqqissiviilliortoqarsimannginnerarlugu.
