Nuummi atuarfiit ilaanni nerisarfeqalissaaq

Nuummi meeqqat atuartut taquassaminnik taniisariaarutissapput allanilluunniit taquartariaarutissallutik.

Angajoqqaat, Ukaliusami siulersuisuinut ilaasortat, atuarfiullu pisortaat atuarfiup nuannisartarfiani nerisarfeqalernissaq maanna misissuiffigaat, Nuup Kommuneata nittartagaani tamanna atuarneqarsinnaavoq.

- Suleqatigiissitaqalerpoq, taakkulu aalajangerput atuartut peqataatikkiartuaarneqassasut. Atuartut siulersuisuisa atuaqatigiiaarlugit peqataatilernissaasa saniatigut, atuarfitsinni september 2006-imi arpaqatigiinnissatsinnut atatillugu ”Atuarfipput peqqissoq” qulequtaralutigu oqallisissaagut, USK-ip pisortaa, Karno Lynge, oqarpoq.

Atuarfiup fiistertarfia iluarsartuunneqassaaq kantiinatullu pequtsersorneqassalluni.

Fiistertarfiup iluarsartuunneqarnissaanut Nuup Kommunea ukioq mannamut 1,5 millioni koruuninik tapiissuteqarpoq, taava ukiuni 2006-imiit 2009-p tungaanut ukiumut 500.000 koruunik ingerlatsinermut tapiissuteqassalluni. USK-imi atuartut nerisassatik namminneq akilertassavaat. Nerisassat sorliit qanorlu akeqarnissaat suleqatigiissitat paasiniagassaasa ilagissavaat. Atuartut USK-imi nerisarfittaarnissaat 2007-p ingerlanerani piviusunngorsinnaassaaq.