Nuummi atuarfiit arsaallutik unammipput

Nuummi  Illorsuaq Timersortarfik pingasunngornermi ullaarnaniit atuartunik ulikkaarpoq, illoqarfimmi atuarfiit tamarmik imminnut unammillutik arsaannerat ’Torrak’ ullumimiit ingerlanneqalermat. Nukappiaqqat niviarsiaqqallu illup iluani isikkamik arsaannerat isiginnaarlugu assut takujuminarpoq, kammalaatit atuaqatit unammigaangata ajugaaqqullugit nipiliorlutik kaammattortarpaat.

-Pingasunngornermi atuartut 4.klassiniit 7. klassit tikillugit unammissapput. Aqagulu ulloqeqqata-tungaa atuartut annerit unammissapput. Atuartut ukioqatigiikkuutaat imminnut unammissapput. Unamminerit naapertuilluartumik taamaalillutik ingerlanneqassapput. Ukiut kingulliit pikkunaakujussimavoq, taamaattumik unammisitsinermi nutaaliornissaq isiginnaartunullu nuannernerusumik ingerlanneqarnissaa ukioq manna sulissutigisimavarput. Unammisitsisarneq ileqqutoqqat malillugit ingerlanneqartartoq nutaaliortoqareersoq nalilissagutsigu, unamminerit siulliit ingerlanneqareersut, eqqarsarluarnertut nalilersinnaavarput, taama Torrak-mi ataqatigiissaarisoq Tina Egede oqarpoq.

Unamminerit tamarmik fem minutsinik sivisussuseqarput, dommerilu siggaraangat unammisut aalaniapallattarput. Isiginnaariat aamma uummaarittaqaat, ukioq mannalu isiginnaariat eqimattakkuutaarlutik timersortarfimmi immikkut inissalerlutik arsaattut kaammattortarpaat. Isiginnaartut allagartarsualisartarput, atuarfimmilu assigiinngitsuni atuartut unammisoqarnerani ataatsimoorrattarput.Unammineq naaleraangat nipituumik sekundit kisittarpaat.Målertoqaraangat nuannaatsallutik nilliasarlutik Unamminerillu naagaangata isiginnaartut atuarfik illersugartik ajugaasimagaangat nuannaarlutik nipiliortarput.

-Ukioq manna qujanartumik tapersersorneqarluarluta amerlasuunik sponsoreqarpugut, tamannalu kingunerisaanik immikkut saniatigut suliaqarsinnaasimavugut.Nunanut allanut unammisartut sisamat inaarutaasumik ajugaaniutivinnermi akissarsiassanik tunniussiartortinnissaat iluatsippoq. Meeqqat atuanngerfeqarnerminni ulloq ataaseq uunga atorumammassuk assut alutoraara, taama Tina Egede isumaqarpoq.