Nuummi atoqqitassaarniarfik aatsaat taama kaaviiaartitaqartigisoq
Atoqqitassanik tuniniaavimmi atorluarneqaqisumi tuniniakkat amerlanersaat annerpaamik 50 koruuneqartarmata, 1,2 millioner koruunit qaangermatigit tunisat ingerlalluarsimassapput.
Tuniniakkat atoqqitassat KRK-p Nuummiunit pisarpai, pisiniartitsinerlu nammineq piumassutsiminnik sulisunit ingerlanneqarpoq. Tamakku akunnerpassuarni sulisartut, KRK-p allaffimmi pisortaa Kirsten Mortensen nalunaarpoq.
2015-imi pisinianit nuannarineqarnerpaasimasut tassaapput inuusat nuersakkat Inuk aamma Inuuna. Taakku Aase Nygaardimit Nöele Simonimillu nuersarneqartartut. Taakkuinnaat 84.000 koruuninik isertitsissutaasimapput ilanngarnagit angerlarsimaffeqanngitsut nerisassaannut atorneqarsimasunik.
KRK-Nuup ukiup ingerlanerani isertitami ilai Nepalimi nunap sajunnerani eqqugaasunut katersuiniartunut 50.000 koruunit tapiissutigisimavai, aammalu ilaqutariit pissaaleqisut juullimut pisiniutissaattut 376.750 koruunit agguaassimallugit.