Nuummi atisanik ilusilersuisartoq Arctic Circle Businessimi pisortanngulersoq

Aallarnisaasoq, inuussutissarsiornermilu ilaatigut atisaarniarfimmik Nuuk Couture-imik suliaqartoq, Louise Lynge Berthelsen Arctic Circle Businessimi, ACB-mi pisortanngussaaq.

Peqatigiiffik tusagassiuutinut nalunaarummi allappoq.

- Atorfik soqutiginarluinnarsoraara. Ukiuni qulingajanni aallarnisaasuullunga inuussutissarsiutilerivunga.

- Allat atorsinnaasannik iluaqutigisinnaasaannillu ilisimasarpassuaqarlunga misigisimavunga, ilisimasakkalu Nuuk Couturemi pisortaaginnarallartillunga ingerlateqqissinnaanngilakka, pisortaq nutaaq oqarpoq.

Nuuk-Couture qimaleraa

41-nik ukiullip, Louise Lynge Berthelsenip atorfimminik nikisitsinermini peqatigiiffimmilu atuuffini sammisinnaaniarlugu Nuuk Couture-imi pisortatut aamma tunuassaaq.

- Taava imaappoq uanga Nuuk-Couturemik ingerlatsissanngilanga. Imaanngilaq matulersoq, imaluunniit ajortoq, illuatungaanilli isumaqarluni, Louise Lynge Berthelsen oqarpoq nangillunilu:

- Imaaginnarpoq ukiuni qulingajanni Nuuk-Couturemeereerlunga unammillernartunik nutaanik pisariaqartitsisunga, Nuuk-Couturelu ingerlalluaqigami uanga aqutsinissara pisaqarunnaarpoq.

Aallarnisaasup atuuffik Juliane Henningsenimit maanna Qeqqata Kommuniani pisortaanermit nangissavaa.

- Aammattaaq inuussutissarsiorfiit suliffeqarfiillu pioreersut taakkulu ineriartornissaannut periarfissaat nakkutiginerorusuppagut, Arctic Circle Businessimi siulersuisuni siulittaasoq, Anette Lings, oqarpoq, nangillunilu:

- Taamaammat Louise Lynge Berthelsenitut pisinnaanilimmik atorfinitsitsinissaq pissusissamisoorpoq, pissutigalugu piumassuteqarluarlunilu misilittagaqarluarnermini aallarnisaanermi nunanullu allanut tuniniaanermi siunnersuinermilu takutitsilluarmat.

Arctic Circle Business peqatigiiffiuvoq namminersortoq, peqatigiiffiup inuussutissarsiuteqartut anguniagaannik pitsanngorsaaniartuuvoq.

Suliffeqarfiit peqatigiiffiillu 65-it Arctic Circle Businessimi ilaasortaapput.