Nuummi arpatsitsineq nutaaq iluatsilluartoq – arpattartunik nunatsinnut pilerinarsaataassasoq
Pinngortitami arpatitsineq nutaaq nunatsinni misigisassarsiorluni takornariaqarnermut tulliulluni ineriartortinneqarsinnaava?
Suliffeqarfiup nutaap Assut Adventuresip tamanna neriuutigaa.
Suliffeqarfiup pinngortitami arpatsitsineq Nuuk Five Peaks sapaatip akunnerata naanerani aaqqissuuppaa, aaqqissuisut peqataasullu arlallit oqarnerat naapertorlugu arpatsitsineq iluatsilluarpoq.
- Aaqqissuussineq arpaffissatullu nalunaarsugaq tigulluarneqarpoq, Assut Adventuresimit aaqqissuisut ilaat, Søren Würtz oqarpoq.
- Peqataasut apuuffissaminnut apuullutik medaljinnakkamik naak qasullutillu nukeerulluinnaraluarlutik qungujulallutik arpannermik nuannersuuneraanerat oqiliallaataalluinnarpoq, taanna oqarpoq.
- Arpaffissamik pitsaasumik pilersitsiniarluta nukippassuarnik atuinikuuvugut. Nuannaarpugut, oqiliallappugut arpatitsinermillu ineriartortitseqqinnissatsinnut piareersimavugut.
Ungasissutsit marluk
Nuup avataani qaqqani tallimani arpatsitsinermi 71-it peqataapput, ullorlu akissarsititsinermik Killunilu nereqatigiinnermik naggaserneqarpoq.
Arpannermik aqqut pingaarneq qaqqani ingerlavigiuminaatsunik katillugu 2.000 meterinik portussuseqartumik aqqusaagaqarfiusoq 25 kilometerinik isorartussuseqarpoq.
Arpanneq sisorartarfimmi majuartaatip eqqaani aallartippoq, tassanngalu Quassussuaq, Qallussuaq, Ukkusissaq aamma Kangilequtaat Kuanninnguillu aqqusaariarlugit sisorartarfimmi majuartaatip eqqaanut uteqqillutik.
Misilittagakinnerusunut naannerusumik aamma aqquteqarpoq, taanna Nuuk Trailimik taaguuteqarpoq, taannalu 10 kilometerinik isorartussuseqarpoq, 700 meterinillu portussuseqarluni, taannalu arpaffiullunilu pisuffigineqarsinnaavoq.
Søren Würtzip oqarnera naapertorlugu nunatta takornariaqarnermi tamanna pisariaqartippaa.
- Arpatsitsinitsialannik peqareerpoq, kisianni illoqarfiup eqqaani pinngortitami pigisatsinni arpatsitsinerit amigaataapput, taanna oqarpoq.
- Nutaamik mittarfeqalernikuuvoq, taamaammat tikinnissaq ajornaanneruvoq. Inuit arpannermik soqutigisaqartut soqutigisartik pillugu angalarusussuseqartut ilisimavarput. Nuup eqqaani pinngortitaq arpaffigissallugu immikkuulluarilluinnarlunilu nuannersuusoq ilisimavarput. Taakku pingasut ataatsimoortillugit nuannerluinnartumik pilersitsissaagut.
Nunanit tamalaanit peqataaffigineqarnissaanik anguniagaqartut
Pinngortitami arpatsitsineq nunani tamalaani ineriartorpoq. Trail running-imik niuerneq 20 milliardit dollarit sinnerlugit ullumikkut naleqarpoq, takornarianullu arpatsitsinerit immikkut ittut ukiuni kingullerni ineriartugaatsiarlutik.
Inuit amerlanerusut arpatsitsinernik immikkut ittunik misigisaqariartorlutik angalasalerput.
Assut Adventures taamaammat anguniagaqangaatsiarpoq. Suliffeqarfiup nunanit tamalaanit peqataasoqartalernissaa anguniagaraa, Nuuk Five Peaksilu nunanit allanit soqutiginninnerujussuarmik pilersitsisinnaasorivoq. Arpatsitsineq UTMB Indeximik atuiffiusuni siulliuvoq, taamaalilluni nunani tamalaani arpannermik unammisitsinerni akornanniilerluni.
- Inuit pingaartumik pinngortitami arpatsitsinerni arpattartut nunarsuarmi amerliartugaatsiarput. Tamanna peqataaffigerusupparput, Søren Würtz oqarpoq.
Aaqqissuisut oqarnerat naapertorlugu Nuuk Five Peaks danskinut suliartortunut nunaniillu allanit tikeraanut kisimi arpatsitsinerunngilaq. Tamanna nunaqavissunit arpattartunit aamma soqutigineqarluarpoq.
- Nunaqavissut suliartortullu amerlasuut peqataalluarput, Søren Würtz oqarpoq.
Bent Salling (3:28:22) 25 kilometerinik isorartussusilimmi ajugaavoq. Julie Katzke Simonsenilu (03:41:40) arnani siulliulluni apuuttuulluni.
Siunissaq isumalluarnartoq
Arpatsitsineq ukioq manna aaqqissuunneqaqqaarnera pissutigalugu siunissami arpatsitsisarnissap malugineqartilernissaanut tunngavilernissaanullu siullertut tunngassuteqarpoq, aaqqissuisut oqarput.
- Ukioq siulleq misilittakkanik pilersitsinissamut najukkami attaveqaateqalernissamut nunarsuarmilu ilisimaneqalernissamut tunngassuteqartoq ilisimavarput, Patrick Bech nunatsinnit ultramik arpattartuni misilittagaqarnerpaat ilaat, arfininngornermi arpatsitsinermi aqutsisoq oqarpoq.
- Allanit arpatsitsinerup ilippanaateqarneranik takunnissinnaasunit anguniakkatsinnillu piviusunngortitsinissatsinnut tatiginnillutik tapersersuisoqangaatsiarnera malugaarput: Visit Nuuk, Grønlandsbankenip Inuussutissarsiornermut Aningaasaateqarfia, Greenland Brewhouse aamma Air Greenland.
Søren Würtzip aqqut nalunaaqutsersimasoq arpattartunit pisuttuartartuniillu maanna atorneqarsinnaasoq, ukioq mannalu arpatsitsinermit assit videollu nunani tamalaani arpannermik soqutigisaqartunut allanut Nuummut pilerinarsaataassasut oqaatigaa.
Nuuk Five Peaksip 2027-mi juulip 31-anni tulliani aaqqissuunneqarnissaa naatsorsuutigineqarpoq.
