Nuummi aqquserngit assut quasattut

Nunatsinni illoqarfiit annersaanni ulluni kingullerni aqquserngit pisuinnaallu aqqutaat assut quasapput. Saniatigut anorersuartaqattaarpoq anoraasuartarlunilu. Sila taamaatsillugu inuit annerpiartut ikittuinnaasarput anigaangamillu sianigeqqissaarlutik pisuttarlutik. Taamaammat ulluni kingullerni orlullutik ajoqusertut amerlasoorujussuusimanngillat nakorsiartarfimmilu pisarnermiit ulapinnerunngillat:

- Orlullutik annertut amerlerialaarput taamaattoq pisarnermit ulapinnerunngilagut. Ilaatigut misigisinnaasarparput immikkut soorlu quasarujuss inuit annertunerusumik sissuernerusartut, Region Sermersuumi nunap immikkoortuani nakorsaaneq, Jesper S. Olesen oqarpoq.

Inuit aqqusinerni pisutsillutik orlusimagaangamik napisartagaat assigiikkajuttarput:

- Inuit paffitsik napikkajuttarpaat, orlunermi soorlu assak oqimaangaatsiartumik ajaperfigalugu pillutsillugu. Napineqarajuttoq alla tassaavoq singerneq, nakorsaaneq Jesper S. Olesen.   

Aqqusinerni pisuinnaallu aqqutaanni sermit sumiinnersut ersilluarput taamaattumik inuit nalunngilaat sianigalutik sukkut pisuttassanerlutik. Quaallutik orlusartut inersimasuusarput, utoqqaat, meeqqat aamma inuusuttut.

- Inuit massakkut quasappallaarsorerpasippaat. Taamaammat quaannaveeqqutit naqqullit atortarpaat inuillu ilaallu tasiorlutik pisuttarlutik, nakorsaaneq Jesper Olesen oqarpoq.

Juulliliivippoq taamaammat orlussagaluaruit napisoorlutillu juullimi niukkut imaluunniit talikkut qeqorarlutit juullisiortariaqalissaatit.

-Taamaammat inuit kajumissaarusuppagut kamippaat quaannaveeqqutinik naqqullit atortaqqullugit. Taleq niorluunniit napisimagaannimi  juulli nuannerpallaarnaviannginnami, nakorsaaneq Jesper S. Olesen oqarpoq.

Saaneq napisoq sapaatip akunneri pingasut allaallu sapaatip akunneri arfinillit ingerlaneranni aatsaat tumarsinnaasarpoq.