VIDEO Nuummi aput sisoortinniarlugu qaartitsisut

Politiit nuna tamakkerlugu apummik sisoortoqarsinnaaneranik sapaatip akunnerata siuliani mianersoqqussuteqarput. Nuummi Sisorarfiit ujakkaartartut aqqusaartagaanni aput sisoorsinnaaneranik ulorianaatilik ullumikkut qaartitsiffigaat, apullu annertooq kaanngartillugu.
Allattoq Mads Pedersen
marsip 28-at 2017 10:38

Sapaatip akunneri marluk missaat matuma siorna qaartiterutit dynamitit pingasut atorlugit qaartitsipput, apulli sisoornani. Ullumili ataasinngornermi qaartiterisartoq qaartartunik sakkortunerusunik nassarluni misileeqqippoq. 

Ullumi dynamitit qaaqartartullu anfot katillugit 26 kiilut ruujorinut arfinilinnut poortukkat, sumiiffimmi apummik sisoortoqarnissaanik ilimanaatilimmi Arne Hardenberg Greenlandimeersoq peqatigalugu nalilikkami, qaartiterisartoq Larsen & co.-meersoq peqatigalugu qaartippaat.

- Kingullermik qaartitsigatta susoqangaanngilaq. Dynamiti atugarput mikivallaarsimagami aammami misilinnikuunngisaannaratsigu, Kunuk Evaldsen Sisorarfinni aqutsisoq oqarpoq. 

- Ullumikkut aput kaangartipparput apullu qalleq sisoortillugu. Annerusumilli susoqanngilaq, Kunuk Evaldsen KNR-imut oqarpoq. 

Aputip sisoornissaa ulorianarsimassappat qaartitsinermi sisoorsimassagaluartoq Arne Hardenbergip nalilerpaa. Taamaammap maanna ulorianartoqanngilaq, taamaattoq innuttaasut pinngortitamiitsillutik mianersornissaannik kaammattorneqartut Sisorarfiit ilisimatitsipput.  

KNR-p qaartitsinermi videoliaa allaaserisap qulaaniittoq takuneqarsinnaavoq. 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq