Nuummi appisimaarnialeqaat

Tusarnaartitsineq taaguuteqarpoq Nuuk Underground, nipilersortartut tusaarnartitsinissaminnut periarfissaqanngitsut tusarnaartitsinerat.

Katersorfimmi tusarnaartitsineq taaguuteqartinneqarpoq 2,0 Nuuk Underground aappasaaa Nuummut tusarnaartitsinissaa pineqarluni.

Nuuk Underground suillermeerluni siorna aaqqissuunneqarmat Nuummi Aliikkusersuisartut Isiginnaartitsisartullu Peqatigiiffiata, NAIP-ip, illuutaanni tusarnaartitsisoqarpoq, illu taanna tusarnaarianik ulikkaarpoq.

Nipilersortartut ilaat illorsuarni tusarnaartitsiviusinnaasuni soorlu Kulturikkut Illorsuarmi Katuami timersortarfimmi Godthåb Hallen-imi Inussivimmiluuniit tusarnaartitsinissaminnut periarfissaqannngillat, tusaamassaanerusut illorsuarni taakkunani tusarnaartitsinissaminnut periarfissaqarluarmata, Nuuk Underground-imi aaqqissuisut ilaat Lu Berthelsen KNR-imut oqarpoq.

Lu Berthelsen isumaqarpoq, inuusuttut nipilersortartut nipilersorfigisinnaasaminnik, nuannarinnitsiminnillu naapitsiffigisinnaasaminnik, amigaateqartut. Inuusuttut akornanni nipilersortartorpassuaqarpoq, ikittunnguilli kisimik CD-lornissaminnut periarfissinneqartarput, nipilersugaat immaqa kajumigineqarpiarneq ajormata.

Nipilersortartut tusaamaneqarpianngitsut nipilersoriaasiat, misigissutsikkut itisuunik sakkortuunik nuannaarnernillu imaqarput, tusarnaartitsinerillu tusarnaartunut sunniuttarlutik Lu Berthelsen oqarpoq.

Underground-imik nipilersortartut amerlanerit kalaallisut allallu tuluttut erinarsortarput, nipitoorujussuarmillu tusarnartitsinissaat ilimagineqarsinnaasoq, Lu Berthelsen-ip ilimasaarutigaa.

Tusarnaartitsinineq Nuummi katersortarfimmi unnugu arfineq marlunut qiteqquppat aallartissaaq ullaassaru pingasunut tungaanut ingerlassalluni.