Nuummi angutit marluk aallaasersornerup kingorna tigusarineqarput
Nuummi arfininngormat unnukkut arfineq marluk missaani Amutsiviup eqqaani aallaammik eqqarpaluttoqarnera tusaaneqartoq politiinut nalunaarutigineqarpoq.
Tamatuma kingunerisaanik unnukkut arfineq marluk missaaniit unnuap qeqqata tungaanut politiit aallaammik eqqarsimasut tigusariniarpaat, kingullerli unnuap qeqqata missaani politiinit tigusarineqartoq, Frederik Heilmann, Nuummi politeqarfimmeersoq Radioavisimut taama oqaluttuarpoq.
Angut 33-inik ukiulik angullu 53-inik ukiulik aalakuungaatsiartut inunnut eqqoriaanatik amutsiviup eqqaani ooqattaasarsimasut politiinit tigusarineqarput.
Politeqarfimmiillu erseqqisaatigineqarpoq inunnut qunusaarisimanngitsut.
Taamatorli unnukkut arfineq marluk missaannit unnuaq qeqqata tungaanut aqqusineq 400-rtalimmik taagutilik, Nuussup tungaanut aqquserngup kaajallattariap siulliup aqquserngup 400-rtallip tungaanut atasoq kiisalu putorsuup illua tungaani, Nuummi umiatsiaaqqat talittarfiata eqqaanittoq biilerfigineqarsinnaasimanngillat.
