Angut 34-inik ukiulik Nuummi Ukkusissani sisorartilluni imminut aqussinnaajunnaarluni uppippoq 150 meterinillu portutigisumiit sisoorluni nakkarluni. Oqaatigineqarpoq angut niaqqumigut kilerujussuarsimasoq tupassimaqisorlu.
Politiit qatserisartullu 34-inik ukiulimmik ujaasiartortinneqarput. Qatserisartullu qamuteralaanik ingerlatsisumit angut nassaarineqarpoq Air Greenlandillu qulimiguuanik aaneqarluni.
Angutip qatanngunni angut 36-inik ukiulik sisorariaqatigisimavaa. Qatanngutaa mattutissanik oqarasuaammillu angallattakkamik nassarsimavoq taannalu atorlugu ikiortissarsiorsinnaasimapput.
- Pisuusoqarani ajutoorneruvoq. Atortorissaarutaat ajoquteqanngillat, qanorluunniilli pisoqarsinnaasarpoq. Ikiuinerput ajunngitsumik kinguneqarmat nuannarutigaarput, Nuummi politeeqarfimmi pisortaq Bent Heiselberg oqarpoq.
34-inik ukiulik erngerlugu ikiorserneqarniassammat napparsimaviliaanneqarpoq. Qanorinnersorli politiinit suli ilisimaneqanngilaq.