Sulisut 20-t ukiup affaata ingerlanerani soraartut: Nuummi angerlarsimaffimmi ikiortinik sulisoqarniarneq suli ilungersuutaasoq

Innuttaasut utoqqartaannik isumaginnittussat ikippallaarnerat suli ajornartorsiutaavoq.

Taama oqaluttuarpoq Karen Lund Mølgaard, Kommuneqarfik Sermersuumi utoqqarnik isumaginnittoqarfimmi pisortaq. 

- Pissutsit suli ilungersunarput, sulisulli amerliartortinnissaat innuttaasullu pisariaqartitaannik ikiorneqarnissaat qulakkeerniarlugu suliuartuaannarpugut, Karen Lund Mølgaard allakkatigut taama akissuteqarpoq.

KNR-ip allagaatinik takunninniarneranit Nuummi angerlarsimaffimmi isumaginninnermi sulisut, aalajangersimasumik atorfillit, ilinniarsimasuunngitsut, eqqiaasut taartaasullu ilanngullugit, sulisut 33-t piffissami septembari 2025-mit ukioq manna marsip tungaanut soraarsimanerat paasinarsivoq.   

Kommuneqarfik Sermersooq Nuummi angerlarsimaffini isumaginnittussanik sulisussaaleqilluinnarmat januaarimi upalungaarsimasariaqarsimavoq.

Allagaatinik takunnissinnaanermit sulisut sisamat januaarimi soraarniuteqarsimanerat – ataaserlu soraarsitaasimanera aamma paasinarsivoq.

Ajornartoornermi periusissat suliasussarsiorniarnermilu ajornartorsiutit

Kommuneqarfik Sermersuup nittartagaani allassimanngilaq angerlarsimaffimmi isumaginnittussanik nutaanik aalajangersimasunik sulisussarsiortoqarpasinngilaq. Taartaasussarsiorlutilli allagartaliuussaqarput.

Piffissami killilimmi taartaasut ilanngunnagit Nuummi angerlarsimaffimmi ikiortitut sulisut 20-t suliunnaarsimapput. Taakkunannga sulisut tallimat soraarsitaasimapput 15-illu namminneq suliunnaarsimallutik.

- Angerlarsimaffimmi ikiortit amigaataanerat sulisussarsiornermilu ilungersunartut pissutigalugit ajornartoornermi periusissat atulersinneqarput, Karen Lund Mølgaard oqarpoq nangillunilu:

- Sulisussanik amigaateqarneq suli ilungersuutaavoq, taamaattumik kommunip angerlarsimaffimmi ikiortinik sulisussarsiortuarnissani sulissutigiuarpaa.

Nuummi angerlarsimaffimmi ikiortit qulingiluat amigaataanerat januaarimi nalunaarutigineqarpoq.

Soraarsitsinerit oqaaseqarfigineqanngitsut

Karen Lund Mølgaardip sulisut ilarpassui januaarimi sooq soraarniuteqarnersut oqaaseqarfigiumanngilaa:

- Sulisut ataasiakkaanut tunngasut soraarnerannullu pissutaasut oqaaseqarfigineq ajorpagut, inuit pillugit paasissutissanik imaqarmata, taanna oqarpoq.

Sulisoq decembarimi soraarsitaasoq sulisullu sisamat namminneq soraarniarlutik aalajangertut, tamarmik ilinniarsimasuunngitsutut nalunaaquttap-akunnermusiaqarlutik sulisimapput. 

Sulisut arfineq-pingasut nalunaaquttap-akunnermusiaqarlutik septembarimiit ukiup affaani marsip tungaanut sulisimasut, soraarsitaapput suliffimminniilluunniit namminneq soraarlutik.

Karen Lund Mølgaardip sulisut sulisussaaleqineq pissutigalugu suliassallu amerliartortillugit tatineqaleraluttuinnarnerat januaarimi oqaluttuaraa:

- Angerlarsimaffimmi ikiortinik pisariaqartitsisut amerliartornerat, sulisussaaleqineq suliassallu amerlassusaat imminnut naapertuutinnginnerat pissutaasinnaavoq. Tamanna suliassaqarnerulersitsivoq taamaattumik sulisussaaleqileraluttuinnarpugut.

Kommuneqarfik Sermersuup ajornartoornermi periusissiaq marsip aallaqqaataanni atorunnaartoq angerlarsimaffimmilu ikiorteqarneq tamatuma kingornali nalinginnaasumik ingerlalersoq paasissutissiissutigaa.