Assi: Kommuneqarfik Sermersooq

Nuummi angerlarsimaffeqanngitsut ornittagassaat aappaagu piariissaaq

Nuummi angerlarsimaffeqanngitsut ornittagassaat unnuisarfissallu aappaagu ukiup qiteqqunnerani iserterfigineqarnissaat Kommuneqarfik Sermersuup naatsorsuutigaa.

Kommuneqarfik Sermersuumi kommunalbestyrelsemi ilaasortat amerlanerussuteqartut isumaqatigiissutigaat Nuummi angerlarsimaffeqanngitsut ornittagassaannik nutaamik sanaartortoqassasoq.

Angerlarsimaffeqanngitsunut unnuisarfissaq angutinut arnanullu immikkoortortaqassaaq inissiallu mikisut angerlarsiffeqanngitsut najugaqarfissaat sanaartorneqassapput, Kommuneqarfik Sermersooq tusagassiuutinut nalunaaruteqarluni taama allappoq.

”Aalajangerneq assut nuannaarutigaara. Angerlarsimaffeqanngitsut uummateqarfigaakka, inuunerminnilu ingerlariaqqinnissaannut ikiorniarlugit inissialiornissatsinnut politikkikkut angusagut assut tulluusimaarutigaakka”, Kommuneqarfik Sermersuumi borgmesteri Charlotte Ludvigsen taama oqarpoq.

Angerlarsimaffeqanngitsut inissaannut ornittagassaannullu sanaartornissamut neqeroortitsineq ukioq manna pissaaq, aappaagulu ukiup qiteqqunnerani iserterfigineqarnissaannut piareersimassapput.

Kommunip angerlarsimaffeqanngitsunut neqeroorutaanik atuisut maannakkut 120-nik amerlassuseqarput

COVID-19-imik tunillatsinnissamut aarlerinartorsiornermut atatillugu angerlarsimaffeqanngitsunut tupeqarfilioreernerup kingorna atuisut 50 procentingajannik marsip qaammataai amerleriaateqarput.

AAMMA ATUARUK Nuummi angerlarsimaffeqanngitsut inissaannik tupeqarfimmik naappaasoqarpoq

Angerlarsimaffeqanngitsunut ornittakkap atorneqalernissaata tungaanut

angerlarsimaffeqanngitsut inissaqartariaqarmata, kommunalbestyrelse containerinik inissianik arlalinnik pisiniarluni kiisalu illoqarfiup qeqqani blokkit marluk inuerunnikut angerlarsimaffeqanngitsut inissiaatut utaqqiisaasumik atulerniarlugit aalajangerpoq.

Angerlarsimaffeqanngitsunut tupeqarfimmut pioreersumut attartornissamut isumaqatigiissut septembarip aallaqqaataata tungaanut sivitsornissaa pisariaqarsimavoq.

Utaqqiisaasumik suliniutaagallartut katillugit 4,6 millioninik akeqarput.

”Coronamik aarlerinartorsiorneq suli qaangiutinngilaq, angerlarsimaffeqanngitsullu toqqissisimasumik unnuiffissaqarnissaat qulakkeertariaqarparput. Taamaattumik utaqqiisaasumik aaqqiissutissanut aningaasaliinerput assut nuannaarutigaara”, Charlotte Ludvigsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat