Nuummi angerlarsimaffeqanngitsut akerliussutsimik takutitseqqammerput

Angerlarsimaffeqanngitsut kommuninut apriilip ulluisa aappaanni qinersinermi Kommuneqarfik Sermersuumit aamma eqqarsaatigineqarnissaat pillugu, Nuummi angerlarsimaffeqanngitsut akerliussutsiminnik ataasinngormat takutitsipput.
Allattoq Mads Lynge
marsip 20-at 2013 18:47

 

Angerlarsimaffeqanngitsut ilaat, Viiveeraq Efraimsen, Radioaviisip oqaloqatigaa:

- Inimik anginerusumik tunineqarnissarput pillugu akerliussutsimik takutitsivugut, inuiaqatigiinnilu isiginiarneqarnissarput aamma pissutigalugu, Viiveeraq Efraimsen, Nuummi siorna aggustimili angerlarsimaffeqanngitsoq oqarpoq.

Inissiat pingasut Nuummi angerlarsimaffeqanngitsunut ornittagassatut aaqqissuunneqarnikuupput, Café Kialaamik taaguuserneqarsimalluni.

Angerlarsimaffeqanngitsut ilaat Café Kialaami aamma unnuisinnaapput.

Inuit ullormut 30-t 40-llu missaat Café Kialaamiikkajuttarput, inuillu 26-t unnuisinnaallutik.

Inuit Café Kialaamik atuisartut qassiuneri kisitsisaatigineqanngikkaluartoq, ornittakkamik aqutsisup Rosannguaq Berthelsenip oqaatigaa unnuiartorniarlutik takkuttut ilaat itigartinneqartariaqartut, unnuisarfik ulikkaaqqammat.

Inuit 100-t missaat akerliussutsimik ataasinngormat ualikkut nalunaaqutaq marluniit takutitsipput, Café Kialaamit Kommuneqarfik Sermersuup allattoqarfiata tungaanut ingerlaaqatigiillutik.

Naak kommunimit oqaaseqartut ikittuinnaagaluartut, akerliussutsimik takutitsisut kommunimit tusaaniarneqarsimasutut misigipput.

- Oqaaseqartoqarpoq tassa iliuuseqarniarlutik kommuniminngaanniit. Isiginiarneqalernissarput kommuniminngaanniit oqariartuutigivaat, Viiveeraq Efraimsen oqarpoq.

Angerlarsimaffeqanngitsut pillugit qanoq iliornikkut aaqqiisoqassanersoq, kommuninut qineqqusaartut maanna tassa suliassarilissagaat, Viiveeraq Efraimsenip. Alluitsup Paaneersup oqaatigaa:

- Tamatta inooqataagatta, ilaa? Assigiikkatta tamatta. Imaanngilaq angerlarsimaffeqannginnatta isiginiarneqassanngitsugut, Viiveeraq Efraimsen oqarpoq.