Nuummi angajoqqaarsiat: Pitsaanerusumik sullinneqartariaqarpugut

Nuup kommuneata inunnik isumaginnittoqarfianni inuttassaaleqisoqarmat sullissineq ajornakusuulersimavoq. Allaallumi ima ajortigaaq sullissineq isasoriaannaasinnaasoq. Nuummi Ilaqutarsiat Peqatigiiffianni siulittaasoq Ellen Sofie Chemnitz taama oqarpoq:

- Inunnik isumaginnittoqarfiup inuttassaaleqiffiunera malunnarpoq. Isumaqarpungalu inunnik sullissineq isasoriaannaassasoq, Ellen Sofie Chemnitz oqarpoq.

Meeqqat ilaqutarsianut inissinneqartartut sullinneqarnerat naammaginannginnerarlugu oqaatigaa sullissisut taarseraappallaartut, sulisorisallu nammakkersorneqarpallaarnerarlugit

Tamanna pissutigalugu ilaqutarsiat ukiumoortumik pulaarneqartarnissaat ilaatigut iluatsinngitsoortarpoq, Ellen Sofie Chemnitz oqarpoq.

Ukiumoortumik nalunaarusiortarnissamulluunniit aamma piffissaqartoqannginnerarlugit Ellen Chemnitz oqarpoq. Nalunaarusiortoqarnissaa inatsisartut peqqussutaatigut pisartussaagaluarpoq.

Meeqqat ilaqutarsianut inissinneqartatut ukiumoortumik aamma naliliiffigineqartussaapput, Nuup Kommueanilu tamanna naammaginnangitsumik aqunneqartoq aamma oqaatigineqarpoq.