Nuummi aalisartut umiarsualivimmik assersuinissaq aalajangiusimavaat

Nuummi aalisartut tusagassiorfinnut attaveqaataata Johannes Heilmannip erseqqissarpaa, umiarsualivimmik assersuiniarneq inatsisisitigut tunngavissaqanngimmat, peqatigiffitsik kattuffitsilluunniit KNAPK tamatumani tunuliaqutaanngitsut.

- Assersuinissarput aalajangiusimavarput, aalisartut ataasiakkaat nalunaaquttap akunneranut agguaqatigiisillugu 30 koruunit ullumikkut inuussutigisinnaanngimmagit.

- Affai atukkiussatut affaalu aningaasaliissutitut ingerlatseqatigiiffisuarmut Royal Greenlandimut koruunit milliardit affaannik aningaasaliineq qanoq tunngaveqartoq paasivarput. Kisianni taamannak aningaasaliinermi aalisartoq ataatsimilluuniit eqqaaneqanngilaq. Ingerlatseqatigiiffissuup ingerlariaqqinniisamini aalisakkat soqutiginngiinnarniarsinnaanngilai, Johannes Heilmann oqarpoq.

Kisianni aalisarnermut naalakkersuisoq, Ane Hansen, ippassaq aamma oqarpoq, sinerissami tunitsiviit 16-it maanna matoqqasut ammaqqinnissaat siunertaralugu Royal Greenland Arctic Green Foodilu oqaloqatigineqartut.

- Oqaloqatiginneqattaarnerit taakkua tunngavimmikkut ingerlaniarlik. Kisianni akit taamaatsillugit ammaraluarpata aalisartumut iluaqutaanngillat. Saarullimmut aki, agguaqatigiisillugu 3,15 koruunerpiaasoq, aalisartup kialuunniit inuussutigisinnaanngilaa, Nuummi aalisartut tusagassiorfinnut attaveqaataat Johannes Heilmann oqarpoq.