Nuummi aalisartut umiarsualivimmik assersuinerat ingerlaannarpoq
Aalisartut piumasaat angutserlugu umiarsualivimmik assersuiniarlutik aalajangiusimavaat. Nuummi aalisartut aalisariutaatillit KNAPK-imik isumasioqateqarput , siunnersuutissaqarlutillu. Siunnersuutigineqartorli oqaatigiumanagu, Malaaraq Bourup Nielsen oqarpoq.
Illoqarfinni nunaqarfinnilu allani umiarsualivinnik assersuiniarlutik nalunaaruteqartut arlaqartut Malaaraq B. Nielsenip oqaatigaa.
Nuummi aalisartut umiarsualivimmik assersuinerat sivitsorpallaalerpat, Paamiuni Qeqertarsuatsiaani, Maniitsumi, Kangaamiuni, Sisimiunilu aalisartut umiarsualivinnik assersuiniarlutik nalunaarput.
Nuummi aalisartut umiarsualivimmik assersuinerat imaannaangitsuusoq Malaaraq Bourup Nielsen oqarpoq, neriuppullu isumaqatigiinniartoqarsinnnaasasoq assersuineq unitsinneqarniassaammat.
Isumaqatiginniartunik suli nalunaartoqanngilaq, taamaattorli Aalisarnermut Naalakkersuisup Ane Hansenip aalisartunik oqaloqatiginnikkumalluni neriorsuinera utaqqiniarpaat, aalisartoq Malaaraq Bourup Nielsen oqarpoq. Aalisariutit qulit Nuup umiarsulivianik assersuipput. Aalisartut umiarsualivimmik assersuisut VHF radioatigut qunusaarneqarput, assersuinertik unitsinngippassuk angallataat aserorterniarlugit kivisinniarlugillu.