Nuummi aalisartut tamanut unnugu ataatsimiisitsissapput

Aalisarneq pillugu inatsisissatut allannguutissatut siunnersuutit pillugit ataatsimiititsinnginnermi Aalisarnermut Piniarnermullu Naalakkersuisoq, Ane Hansen NAPP-p siulersuisuinik ualeq manna nalunaaqutaq marlunut ataatsimeeqatiserinnippoq. Ataatsimiinneq marsip 16-iani ataatsimeeqatigiinnerup nanginneraa.

- Aalisarnermut inatsisissamut tunngatillugu immikkoortunik arfineq-marlunnik piumasaqaateqarpugut, taakkulu naalakkersuisumut annguppavut, NAPP-p siulittaasua Lars Mathæussen nassuiaavoq.

Aalisarneq ukioq kaajallallugu inuussutissarsiutaassappat pingaartumik aalisarnermi sineriassortuni pitsanngorsaatit arlallit pisariaqartillugit oqaatigaa.

- Soorlu aalisagartassat aamma fabrikkeqarneq iluarsiivigineqartariaqarput. Aalisakkat qaleruallillu ullumikkut iluaqutiginiarneqanngitsut tunisassiarineqartalernissaat periarfissat ilaattut aamma isigaarput, Lars Mathæussen nassuiaavoq.

Innuttaasunut ataatsimiititsineq tamanut ammasuussaaq, aalisarnermik inatsimmut allannguutissatut siunnersuutissat pillugit naalakkersuisoqarfiup aamma aalisartut peqatigiiffiata saqqummiukkumasai tusarneqarsinnaassallutik oqalliseqataaffigineqarsinnaassallutillu.

NAPP-p neriuutigaa innuttaasut amerlasuut Katersortarfimmut takkukkumaartut.