Nuummi aalakoortut ulapitsitsisut

Angerlarsimaffinni eqqissiviilliortitsisut inuillu aalakoortut Nuummi politiinut ulapitsitsipput.
Allattoq Pipaluk Høegh
oktobarip 08-at 2012 12:54

Sapaatip akunnerata ingerlanerani Nuummi politiit 20-riarlutik angerlarsimaffinni eqqissiviilliortitsisut ornittariaqarsimavaat. Aalakoortut qulit aamma politiinit orninneqartariarsimapput. Aalakoortut Nuummi politiinut ulapitsitsinerat minnerunngitsumik sapaatip akunnerata naanerani pisimavoq.

- Inuit imminnut avatangiisiminullu ajornartorsiortitsisut amerlanerpaartaat imigassartorsimasuusarput, Nuummi Politiit ilisimatitsipput.

Nuummi imigassartorsimalluni biilersimasutut pasisaq ataaseq sapaatip akunnerata ingerlanerani tigusarineqarpoq. Biilertup Qinngutsinni napparummut aporsimavoq. Nakuusernerit arfineq marluk politiinut unnerluutigineqarput, aqqusinermilu eqqissiviilliortitsisimasut pingasut aamma politiiniit nalunaarutigineqarput.