Nuuk TV-p pisortaa atorfimminit soraarpoq

Nuup TV-p pisortaa Jens Olsen siumut kalerreeqqaarani atorfimminit ullumi soraarpoq. Pisortap atorfimminit soraariasaarnera tusagassiorfinnut nalunaarummi naatsumi nassuiarneqanngilaq. Siulersuisuni sulisut sinniisaata Jacob Olesenip Nuuk TV-p ulluinnarni aqunneqarnera isumagigallassavaa.
Allattoq Peter Troelsen, Simon Uldum
januaarip 28-at 2013 12:38

Nuuk TV-mi siulersuisut piffissami qaninnerpaami ataatsimiittussaapput tv-qarfiup siunissaa qanorlu aaqqissuussaanikkut ilusigigaanissaa eqqartorlugu. Nuuk TV-mi siulersuisuni siulittaasoq Orla Dalager  pisortamik nutaamik nassaartoqarnissaata tungaanut malunnaateqarnerusumik inissisimagallassaaq.

Jacob Olesen Nuuk TV-mi ulluinnarni aqutsisumik nutaamik pissarsisoqarnissaata tungaanut siulersuisunit tunuarallassaaq.

Siulersuisuni siulittaasoq, Orla Dalager, knr.gl-imit sianerfigineqarluni oqaaseqarusuppallaanngilaq.

Jens Olsenip Nuuk TV-mi pisortaajunnaarneranut suna peqqutaanersoq oqaluttuarisinnaaviuk? Naagga, Dalager akivoq.

Jens Olsenilli taartissaanik atorfinitsitsinissaq apeqqutigineqarmat oqaasissaqarnerulaalerpoq.

-Pisortamik atorfinitsitsinissamik pilersaaruteqanngilagut. Taarsiullugu ulluinnarni aqutsisussamik, suliffeqarfimmi sulianik isumaginnittussamik atorfinitsitsiniarpugut. Pisortap atorfimminit soraartup suleqatiginera nuannaraarput Nuuk TV-llu ullumikkutut inissisimalerneranut suliaanut annertuumut qujassutissaqarfigalugu, Orla Dalager knr.gl-imut erseqqissaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq