Nuuk Snowfestival aallartippoq
Nuummi ukiut arfineq aappassaanni ingerlarneqartoq, Nuuk Snow Festival, tassa apummik ilusilersuineq ullumi aallartippoq.
Ukioq manna apummik ilusilersuineq avataaniit peqataaffigineqanngikkaluartoq taamaattoq holdit 15-iupput tamarmik Nuummeersut. Tamanna ukiuunerata issaasanneranik peqquteqartoq, aaqqissuisoq Flemming Nicolaisen, Nuuk Tourismep pisortaa oqarpoq:
-Ukioq manna avataaniit tikittoqanngilaq. Ataatsit tikittssaangaluit kinguartimmat unipput. Flemming Nicolaisen-ip ilimaginerarpaa siorna ukiukkut issaasanneratigut Snowfestivalip unitsinneqarnera ukioq manna avataaniit tikittoqanngitsoorneranut peqqutaaqataasoq.
- Taamaattumik ukioq manna ingerlannissaa pingaartissimavarput siunissami ilisimaneqarneruleqqinnissaa anguniarlugu.
Flemming Nicolaisen-ip oqaatigaa aappaagu ilulisilersuinissap siuartissinnaanissaa tamanna pillugu oqaluuserineqassasoq. Ilusilersuisut ilaasa HC Andersen-ip oqaluttualiai aallaavigalugit ilusilersuiniarput, ilusilersugassanut ilaalluni Qeerlutuuarapalaannguaq, allat ulluinnarpalaarnerusunik aamma ilusilersuiniartut uniffigitsiarpagut. Eqqumiitsuliornermik ilinniarfimmi ilinniartut peqataapput, taakku kiinaq qania iserfigineqarsinnaasoq sananiarlugu aalajangersimapput.
Apummik ilusilersuisut ataasinngorpat ulloqeqqanut naammassereersimassapput, ualikkut sisamanut ajugaasut pingasut saqqummiunneqassammata. Nuuk Snowfestival Nuup kommuneanit Nunafond-imit suliffeqarfinnillu assigiinngitsunit aningaasaliiffigineqarpoq. Ilulisilersukkanik unnuaanerani piggassisuussapput Nuummi Inuusuttut Siuarsartut.
