Nuuk qatserisarfittaassasoq: Qatserisarfik 2022-mi piareersimassaaq

Qatserisarfik nutaaq nutaaliaanerusorlu 2800 kvadratmeterinik anginerusoq Nuummi sanaartorneqassaaq. Qatserisarfik qatserisarfitoqqamit qiterpasinnerusumi inissisimassaaq.
Qatserisarfissap nutaap sanaartornera 100 millionit koruunit missaannik akeqarnissaa naatsorsuutigineqarpoq, taannalu 2022-mi maajip ulluisa aallaqqaataani atorneqarsinnaalissangatinneqarpoq. Assi © : Kommuneqarfik Sermersooq / Nuuk City Development
novembarip 12-at 2020 13:22

Kommuneqarfik Sermersuup illoqarfimmik ineriartortitsinermi suliniuteqarfiata Nuuk City Developmentip sanaartornermik suliffeqarfik MT Højgaard qatserisarfimmik Nuummi nutaamik sanaartortitsinissamut isumaqatigiissuteqarfigaa.

Qatserisartutut atorfillit namminerlu kajumissutsiminnik suliaqartut qatserisarfiup nutaap ukiut marluk qaangiuppata nutaamik sumiiffissaqalernissaminnut qilaaruteqarsinnaapput.

Qatserisarfik Borgmester Anniitap Aqqunernani ikuallaaviup eqqaani sanaartorneqassaaq. Qatserisarfissap nutaap sanaartornera 100 millionit koruunit missaannik akeqarnissaa naatsorsuutigineqarpoq, taannalu 2022-mi maajip ulluisa aallaqqaataani atorneqarsinnaalissangatinneqarpoq.

Borgmesteri nuannaartoq: Qatserisarfik siunissamut qulakkiigaasoq

Kommuneqarfik Sermersuup borgmesteriata, Charlotte Ludvigsenip (IA) nutaamik qatserisarfeqalissanera nuannaarutigaa.

- Illoqarfiup qeqqani - innuttaasunullu qanittumi inissisimasumik, nutaaliaasumik siunissamullu qulakkiikkamik qatserisarfeqalernissarput nuannaarutigaara, borgmesteri tusagassiuutinut nalunaarummi oqarpoq.

Borgmesterip sulisut kajumissutsiminnillu qatserisartut Nuummi kommunimi upalungaarsimanermik suliaqarnissamut pitsaanerusunik atugassaqartinneqalernissaat, peqatigitillugu aamma inissisimaffissaa nuannaarutigaa. Taamaalillunimi Nuuk tamaat eqqarsaatigalugu illoqarfiup immikkoortortassaa Siorarsiorfik ilanngullugu, pisoqartillugu pilertornerusumik apuuttarnissamut qulakkeerinneqataassaaq, borgmesteri allappoq.

Qatserisarfik 2800 kvadratmeterinit annertunerusoq marlunnik qulereeqartussaq, pitsaasunik sulisunut immikkoortortaqassaaq, biiliisiveqassaaq, biilinik asaasarfeqassaaq bilileriffeqassallunilu, kommune allappoq.