Inunnik nalinginnaatinneqarnerusumit allaanerusumik inooriaasilinnik assigiinngisitsisoqartarnera akiorniarlugu, aammali kikkulluunniit suiaassusaat apeqqutaatinnagit naligiissuunerat oqqersuutigerusullutigu, ingerlaaqatigiisitsilerpugut, Seqininnguaq Poulsen oqarpoq.Assi: KNR

Nuuk Pride: - Oqarusiutitut kanngutsinnartutulluunniit isigineqakkajuttarput

Inunnik nalinginnaatinneqarnerusumit allaanerusumik inooriaasilinnik assigiinngisitsisoqartarnera nunatsinni suli atuuppoq, Nuuk Pridemik aaqqissuisoq oqaluttuarpoq

Suiaaqatiminoortartunik Nuummi ingerlaaqatigiisitsinissaq unnugu arfineq-pingasunut aallartissaaq.

Ingerlaaqatigiisitsisarnerit Nuuk Pridetulli ittut nunatsinni ingerlanneqarnerusariaqarput. Suiaaqatiminoortartutummi, arnanik angutinillu atoqateqartartutut suiaassuserisamilluunniit allannguerusuttutut nunatsinni inuuniarneq imaannaanngilaq, LGBT Greenlandimi aqutsisoq Seqininnguaq Poulsen oqarpoq.

- Nunatsinni ingerlaaqatigiisitsisoqarnissaa qularnanngitsumik pisariaqarluinnarpoq, Seqininnguaq Poulsen oqarpoq. 

- Inunnik nalinginnaatinneqarnerusumit allaanerusumik inooriaasilinnik assigiinngisitsisoqartarnera akiorniarlugu, aammali kikkulluunniit suiaassusaat apeqqutaatinnagit naligiissuunerat oqqersuutigerusullutigu, ingerlaaqatigiisitsilerpugut, Seqininnguaq Poulsen oqarpoq. 

Seqininnguaq Poulsen arnanik angutinillu atoqateqartartuuvoq, angummillu inooqateqarpoq. Nammineerluni arnat arnaqatiminnik angutillu anguteqatiminnik inooqateqartarnerat nalinginnaalluinnartuusoraa. Seqininnguarmilli isumaqatiginninngitsunik inoqarpoq.

Kari Noahsen. Foto: KNR Kari Noahsen. Foto: KNR

- Inuit assigiinnngisitsisartut suli amerlapput, inuillu nalinginnaatinneqarnerusumit allaanerusumik inooriaasilinnut tapersersuisut oqarusiutitut kanngutsinnartutulluunniit isigineqakkajuttarput, Seqininnguaq Poulsen oqarpoq.

Pimmatiginninnerit nakkarsaanerillu

Kari Noahsen anguteqatiminik atoqateqartartuuvoq, assigiinngitsisinermillu pinnittunik nalaatsisareerpoq.

- Nuanninngitsumik alliartorpunga. Alliartorninni qinngasaarneqartarpunga, uumisaarneqartarpunga nunanninngitsunillu allanik pineqartarpunga, Kari Noahsen oqarpoq.  

- Qujanartumik tapersersortigisartakkannik ikinnguterpassuaqarlungalu nuannersunik ilaqutaqarpunga.

Kari Noahsenip inunnik katerisimaaqateqarnermini namminiussuseqarnissani ajornakusoortinnerakkajuttarpaa.

- Uangaassusiviga atorsinnaasannginnakku inunnik ataatsimooqateqarneq uannut erloqinartarpoq. Suiaassutsinnimmi assuarlernissaat kappiagilertarakku ajukkuttarpunga, Kari Noahsen oqarpoq.

Nuuk Pridemik taallugu ingerlaaqatigiisitsineq Amisut eqqaanni unnugu arfineq-pingasuniit qulingiluat missaasa tungaannut pissaaq. Tamatuma kingorna Manhattenimi unnussiuaaqatigiisitsisoqassaaq.

2010-imi siullerpaamik Nuuk Pridertoqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat