Nuuk: Politiit angummik SAR-imik aallartitsisumik ujaasipput
Nuummi Politiit angut Nuutoqqamit umiatsiamik pingasunngornermi qimataqartoq oqaloqatigerusuppaat.
Umiatsiaq Poca 600 pingasunngornerup unnuaani Nuummi Aalisartut Aqqutaannit tillinneqarpoq. Umiatsiaq tamatuma kingorna Nuutoqqami inuttaqanngitsoq nassaarineqarpoq.
Kalaallit Nunaanni Politiit oqarnerat naapertorlugu umiatsiamik angut niusoq illoqarfiullu tungaanut ingerlasoq takuneqarsimavoq.
Angut nalinginnaasumik timeqartoq kalaaleerpasippoq.
Taassuma kavaajaq nasartalik qernertoq qarliillu timersuutit Adidasimik meqqeqartut, niutaatalu sinaanni illuttut qaqortumik titarneqartut atorpai. Angutit kamippaat qaartut aamma atorpai.
AAMMA ATUARUK Nuuk: Politiit tillitamik umiatsiarsimasumik ujaasisut
Inuit angummik Nuutoqqami imaluunniit Aalisartut Aqqutaanni takunnissimasinnaasut imaluunniit arlaannik ilisimasaqartut politiinut oqarasuaammut 70 14 48-mut sianeqquneqarput.
Nuummi Nuutoqqami umiatsiamik inuttaqanngitsumik nassaartoqarnera pingasunngornermi sisamanngornermilu ujaasingaatsiarnermik kinguneqarpoq, politiimmi umiatsiamik tillittup imaanut nakkarsimasinnaanera aarleqqutigaat.
Politiit SAR-imilu upalungaarsimasut taamaattumik politiit angallataat, timmisartuaraq inuttaqanngitsoq alapernaarsuullu ”Ejner Mikkelsen” atorlugit ujaasipput.
SAR-imik suliaqarneq maanna taamaatinneqareerpoq.