Nuuk Paamiuniit pilerigineruaat

Imarsiornermik Ilinniarfiup Paamiuni inissisimanerata kinguneranik tassani ilinnialersartut unitsitsiinnartarneri, Naalakkersuisunit isiginnaaginnarneqarusukkunnaarpoq. Unitsitsiinnartarnermut pissutaasorineqarpoq, ilinniarfiup Paamiuniinnera.
januaarip 08-at 2013 14:31

Taamaattumik Imarsiornermik Ilinniarfiup Nuummut nuutsinneqarnerani anguneqassaaq ilinniartitsisunik pikkorissunik pissarsiniartarnerup ajornannginnerulernera, Ilinniartitaanermut Naalakkersuisoq, Palle Christiansen oqarpoq.

- Ilinniartitsisussaaleqineq peqqutigalugu ilinniartitsinerup pitsaassusiata naammattumik qaffasuseqartinnissa ajornakusoortinneqartoq ukiorpassuarni nalunngilarput. Ilinmniartitsisussaaleqivugullu, atuarfiit illoqarfinni Paamiuni Uummannamilu inissisimaneri pissutigalugit. Taamaattumik atuarfinnut ataasiakkaanut aningaasalersuiinnarsinaanngilagut ilisimallutigu naammattumik pitsaasusilimmik ilinniartitsisinnaanata. Taamammat allannguisariaqarpugut, Palle Christiansen oqarpoq.

Naalakkersuisut januaarip pingajuanni aalajangerput, Imarsiornermik Ilinniarfik Paamiuniittoq Nuummut nuunneqassasoq.

Taama aalajanernermi tunngavilersuutit pingaarnerit ilagaat, ilinniarnerminnik taamaatitsiinartartut amerlavallaalerneri, illiniakkanut tunngatillugu naammattunik attavissaqartannginneq kiisalu imarsiornermik inuussutissarsiuteqartunit ujartorneqartartutut pikkorissarnissamik neqeroorutaasartut annikippallaarneri.

Imarsiornermik Ilinniarfiup Nuummut nuutsinneqarnissaanik aalajangiineq, Imarsiornermi Ilinniarfiup ilinniartitsisuinit nuannaarutigineqanngilaq, taakku oqarput tusarniarneqarsimanatik sooq ilinniarfiup Nuummut nuutsinneqarnissaanik.

- Aalajangerneq ataqqivarput nuussiniarnermulli atatillugu sulisuusugut tusarniarneqarsimannginnerput tupinnartutut isigalutigu. Allakkanik nuussiniarnermut tunngasunik paasissutissinneqartaraluarpugut taamaattorli malinnaatinneqannginnerput tupigisuutigalugutigu, ukiuni kingullerni 25-ini Imarsiornermi Ilinniarfimmi ilinniartitsisuusoq, Peter Jakobsen taama oqarpoq.

Ilinniartitsisup tamarmiullutik ilinniarfiup Paamiuniisinneqarnera iluarigaat Peter Jakobsenip oqaatigaa.

Naalakkersuisunilli ernumagineqarneruvoq Paamiuni ilinnialersartut amerlavallaat ilinniakkaminnik unitsitsiinnartarneri, taamaattumillu siunniullugu ilinniarfiup Nuummut nuutsinneqarnissaa.

- Ilinniartuusimasut ilinniarunnaaginnarsimasullu oqaluttuartarput, assersuutigalugu Paamiuniinnermik sungiussiuminaatsitsillutik. Taannalu ilinniarunnaarnermut peqqutaasunut ilaasarpoq, Palle Chrisitiansen oqarpoq naqissuserlugulu ilinniarfiup Nuummut nuutsinneqarnerani ilinniartitsisussarsiortarnerup ajornannginnerulernissaa anguneqassammat.

- Pitsaaqutissaa tassaavoq, piginnaaneqarluartunik sulisussarsisinnaaleriataassagatta. Tassami Umiartornermik ilinniarfimmi pitsaasuseqarluartumik ilinniartitsisinnaasimangilagut, inuusuttullu ilinniartut umiartornermik inuussutissarsiulernissamut ilinniartissinnasimanagit. Ilinniartitsisullu Paamiunukarnissamut pilerisulersissinnaanngikkutsigit, atuarfiup sumiinnera akornutaasimassaat, taavalu atuarfik nuuttariaqaersimassavarput, Ilinniartitaanermut Naalakkersuisoq, Palle Christiansen taama oqarpoq.

Taassuma ilanngullugu oqaatigaa, Paamiuni Imarsiornermik Ilinniarfiup Nuummut nuutsinneqarnerata kinguneranik, atuarfik ilinniartullu inai iluarsartuunneqassasut, eqqarsartaatsimikkullu innarluutilinnut ilinniarfissatut atorneqalissalluni.