Nuuk nukissiorfinnit dieselitortunit innaallagialersorneqalerpoq

Nuup eqqaani Utoqqarmiut Kangerluarsunnguani erngup nukinga atorlugu nukissiorfik misissorneqarlunilu maskiinat erngup nukinganit kaavitittakkat pingatserneqassammata, aqagumiit juunilu naallugu nukissiorfinnit dieselitortunit, tassa amutsiviup eqqaaniittumit Vandsøvejimiittumillu, Nuuk kallerup innilersorneqassaaq.
Allattoq Mads Lynge
juunip 02-at 2008 17:10

Utoqqarmiut kangerluarsunnguani nukissiorfik pilersaarutaareersutut misissorneqassammat, unitsillugu nukissiorfiit dieselitortut marluk Nuummi kallerup inneranik nukissiorneq ingerlatilissavaat. Ukioq manna pilersaarutigineqarpoq Kangerluarsunnguami nukissiorfimmi qaarusuit Nuummullu kallerup innerata aqqutai misissorneqassasut, taamatullu misissuissagaanni nukissiorfik unitsivissorneqartariaqarpoq. Misissuinissaq iluatsillugu erngup nukinga atorlugu maskiinat kaavitittakkat marluk pingatserneqassapput, taamaalilluni kallerup innerata akia qaffattariaqassanngimmat. Maskiinammi kaavititat arlaat unittuussagaluarpat pingajuat aallartinneqaannarsinnaammat tamanna kallerup inniliornermut apeqqutaasarunnaassaaq. Nukissiorfimmilu suliniutinut akisussaasoq, Ove Nielsen oqarpoq Nuummut kallerup inniliorneq ataavartumik ingerlanneqarsinnaalissasoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq