Nuuk Mountain Challenge iluatsilluartoq

Nuuk Mountain Challenge 2013 65-inik peqataasoqarluni arfininngornermi juunip 15-iani ingerlanneqarpoq. Unammeqataasuni26-it Ukkusissat aqqusaarlugit ingerlaarfissaq naammassillugu ingerlaarfigaat, unammeqataasunilu 39-it Quassussuaq aqqusaarlugu ingerlaarfissakkut naammassinnissimallutik.
Allattoq Peter Troelsen, Knud Reimer
juunip 17-at 2013 11:23

Ukkusissatigoortuni arnani unammeqataasuni Niviaq Chemnitz Berthelsen ajugaasuuvoq, taassuma 1 time 6 minutsit sekundillu tallimat Quassussuakkooriarluni Ukkusissat qaqisimavaa ajugaallunilu. Normu 2 aamma 3 tassaapput Ivalo Rosing kiisalu Aviaaja Heilmann.

Angutini unammeqataasunit OL-imi sisoraatinik ujakkaarluni piukkussaq, tassa Martin Møller ajugaasuuvoq, taassuma 51 minutsit 29 sekundillu aqqut tanneq ingerlaarfigisimavaa, normu 2-nngortoq 3-nngortorlu tassaasimallutik Jesper Christensen kiisalu Lars Henrik Nielsen.

Quassussuakkuuginnarlugu aqqut naannermi unamminermi nukarlersaasut pingasut ajugaasupajuupput. Philip Baadh Juhl siullersaalluni apuuppoq, taassumalu 1 time 18 minutsiffaariit atorsimavai, tullersortaalu Michael Heilmann sekundinik pingasuinnarnik kingulliulaarluni apuussimalluni. Normu 3-tut inissittoq tassaavoq Marco Geisler, taassuma 1 time 21 minutsit 27 sekundillu atorsimavai.

Unammiffimmi naannermi arnani ajugaasoq tassaavoq Rasmine Geisler, taassuma 1 time 24 minutsit 16 sekundillu atorsimavai, normu 2-nngortoq tassaavoq Nuno Baadh, Nivi Olsen-ilu normu 3-nngorluni apuuttuulluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq