Nuuk maraton hackerit iserfigaat
Nuuk maratonimut nittartagaq atorlugu nalunaarsinnaaneq akiliisinnaanerlu ingerlammersoreersimalerpoq. Maannali hackerit Nuuk Maratonip pisortatigoortumik nittartagaa www.maraton.gl akornusersorpaat.
- Maanna misissorparput tamanna qanoq kinguneqassanersoq, aaqqissuisuniit Flemming Enequist KNR-mut oqarpoq.
Taamaattoq arpannissarsuup iluatsilluartumik ingerlanissaa aaqqissuisut isumalluarfigaat arpattullu aqqusinermi Kuussuarmiit kulturikkut illorsuup Katuami eqqaanguaniit arfininngorpat nalunaaqutaq 10.00 aallassapput.
Nammineerluni ornigulluni nalunaarneq ullumi aallartippoq Pikkori Sportimut ornigulluni nalunaartoqarsinnaalluni aqagulu Brugsenimut ornigulluni nalunaartoqarsinnaassaaq.
- Neriuppugut peqataasut 300-ut 400-ullu akornanniikkumaartut, Flemming Enequist oqarpoq.
Maratonimut halvmaratonimullu arpattussaat kiatissaat 100-ut missaanniittut naqiterneqareersimapput
- Imaassinnaavoq kiatit taakku pagganneqartut. Maluginiarparput upernaaq Maaji Nuanip ingerlanneqarnerani sungiusalersut maratonimut halvmaratonimullu sungiusarnertik ingerlatiinnaraat. Ulloq arpaffik umiarsuaq takornariartaat Nuummiittussaavoq taamaammat Tupilak Travel ilisimatipparput takornariat arpaqataanissamut aamma tikilluaqqusaasut, Flemming Enequist oqarpoq.
Arpaffissat tassaapput maraton, halvmaraton, 10 kilometer, minimaraton aamma Nordic Walking.
Nammineq piumassutsimik ikiuuttut aallarfimmi aqqutissamilu piareersimassapput aqqutaanilu imertitsiviit tallimaassapput tassani imeruersaatit tungusunnittut, imeq naatitallu pineqarsinnaassallutik.