Nuuk maraton: Angusatit takukkit
Nuuk maratonimi peqataasut aaqqissuisut neriuutigisaannit ikinnerulaarpoq. Arpannissaq sioqqullugu aaqqissuisut KNR-mut oqaatigaat peqataasut 300-ut 400-ullu akornanniinnissaat neriuutigineqartoq.
Arfininngormat arpannermi peqataasutn 248-upput taakkulu tassa maratonimut, halvamaratonimut, 1o,7 kilometerimut aamma 3,5 kilometerimut arpapput.
Maratonimut Martin Møller aamma Miiti Lynge ajugaasuupput halvmaratonimut Katti Frederiksen aamma Stig Brahe Sørensen ajugaasut.
Angutit 10,7 kilometerimut arpanneranni Kim Godtfredsen ajugaavoq 41,55 minutsit arpalluni tullersortigalugu Christian Kjeldsen 43,27 minutsit arpattoq. Uju Petersen oqilanerit pingajoraat 44,16 minutsit arpattoq.
Arnat 10,7 kilometererneranni ajugaavoq Arnatsiaq R. Olsen 54,27 minutsit arpattoq Maliina Abelsen tullersortaalluni 57,27 minutsit arpakkami. Dagmar S. Joensen Savalimmiuneersoq pingajuuvoq atorsimallugit 58,36 minutsit.
Meerarpassuit 3,5 kilometerimut arpapput niviarsiaqqani 53-it nalunaarsimallutik nukappiaqqani 38-it nalunaarsimasut.
Niviarsiaqqat marluk ajugaasutut nalunaarutigineqarput. Sabina G. Eugenius aamma Stine Petersen 20,48 minutsit atorlugit ajugaapput. Pingajuuvq Ingrid Kjærgaard 22,48 minutsit arpalluni.
Nukappiaqqat marluk oqilanerpaatut aamma nalunaarsorneqarsimapput. Arkaluk Heilmann aamman Michael Heilmann 17,20 minutsit arpassimapput. Marcus Pedersen pingajuuvoq atorsimallugit 19,42 minutsit.
