Nuuk Marathonimi Stig ajugaavoq

5 4 3 2 1 (igerpallak)

Nuuk Marathon 2006-imi ullumi ulloqeqqanut aallartitsisuusoq borgmester Agnethe Davidsen tusarparsi.

Isorartussutsinut pingasunut arpallunilu ajaappiarsorluni pisunneq Nuuk Marathon 2006 ullumi ingerlanneqarpoq. Taamatut arpatsitsisarneq illoqarfinnut allanut siaruaassinnaaguni ajunngissagaluaqisoq, Nuummi borgmester Agnethe Davidsen oqarpoq:

- Taamatut ukiut tamaasa arpatsitsisarnermik takusimasakka malillugit amerliartuinnartut peqataaffigaat. Nuannarineqartorujussuuvoq, qanoq inneq apeqqutaanngilaq aamma utoqqaat, inuusuttut meeqqallu tamarmik peqataapput. Ukiuni kingullerni nunarsuarmioqatitsinnut ammariartornitsinni, peqqissuunissarpullu tamatta pingaartikkatsigu, taamaattumik peqqinnartuuvoq allanik peqateqarluni nuannersumik arpaqataaneq.

Isumaqarpunga aamma aaqqissuusineq taanna nuannersorujussuusoq, aamma kikkunnilluunniit allanit aaqqissorneqarsinnaasoq illoqarfinni allani, borgmesteri aallartippoq.

Soqutigineqariartorpoq timersornissaq, arpattalernissaq, peqqinnartumik inuuneqarnissaq, aamma takutinnaasakka malillugit arpattuinnaanngillat, utoqqarnik utoqqasaanillu ilaqarput. Massakkut mutiusorujussuanngornikuugami ajaappiarsorluni ingerlaarneq, aamma taakkua peqataapput, assut nuannerput isigalugit.

Nuup borgmesteria isumaqarpoq sumiluunniit illoqarfinni taamaasiortoqarsinnaasoq.

Nuuk Marathon 2006-imi inuit 500-t sinneqartut peqataapput, 42 kilometerinut 47-t, 21 kilometerinut 119-it, naannermullu 3,4 kilometerimut meeqqat 350-it arpaqataapput, utoqqasaallu 20-30-it ajaappiarsortunut peqataallutik.

Marathonimi ajugaasuuvoq Stig Brahe Sørensen, siorna aamma ajugaasuusoq. Ajugaasut allat kikkuuneri takorusukkussigit, KNR TV-mi unnugu nalunaaqutaq 20:15 minutsini 15-ini ullumi marathonerluni Nuummi arpaliunnermit takusassaqarumaarpoq.