Nuuk Marathon taamaatiinnarneqartoq
Arpattartut Nuup aqquserngatigut arfininngorpat arpattussaagaluarput, isiginnaartullu aqquserngit sinaannit malinnaasussaagaluarlutik.
Arpattoqanngilarli – ukioq mannami halvmarathonertoqaranilu helmarathonertoqassanngitsoq, Nuuk Marathonimik aaqqissuussisartoq, Kim Godtfredsen nalunaaruteqarpoq.
- Siullertut aningaasaqarneq pissutaavoq. Arpatsitsinerup ingerlannissaanut akissaqanngilagut, taanna KNR-imut oqarpoq.
Nuuk Marathon ukioq manna ukiuni 30-nngortorsiortussaagaluarpoq. Ukiunilu 30-ni arpatsitsisarneq ataasiaannarluni silap ajornera pissutigalugu taamaatiinnarneqarnikuuvoq.
Kim Godtfredsenip oqarnera naapertorlugu Nuuk Marathonip aningaasaliinerpaasartut isumaqatigiinniarfigigaluarpai – isumaqatigiissuteqartoqannginnerali pissutigalugu tamaanik taamaatitsiinnartoqartariaqarluni. Aningaasaliisartummi pingaarnerup peqataarusunnissaanut arpaqataaniartut ikippallaarsimasut, Kim Godtfredsen oqarpoq.
32-t nalunaartut
Ukioq manna 32-nnaat peqataaniarlutik nalunaarput.
- Ukioq manna qularnerpassuupput, coronallu ilungersunartorsiortitsinera pillugu killilersuinerpassuit malinneqartussaallutik. 250-it arpannermut peqataasinnaapput, kisiannimi isiginnaartut?, Kim Godtfredsen oqarpoq.
Taassuma arpatsitsinissap aaqqissuunniarnera ilungersunarsimasoq isertuutinngilaa.
- Sapaatip-akunnerata siuliani isumaqatigiissuteqarsinnaagaluarpugut, arpattussalli amerlassusaat aningaasaliisartumut pingaarnermut naammatsissinnaasimanngilagut. Ikippallaarput. Taamaammat arpatsitsisinnaanata maanna oqarput.
Siusinnerusukkut nalunaarutigisimasinnaanngilisiuk?
- Ilumut, kisianni ukioq manna qularnagaatsiartorpassuupput. Kikkut tamarmik corona pissutigalugu qularsimapput. Qaammatimmi pingasut matuma siorna immitsinnut qiviarluta aperivugut: Qanoq iliussaagut? Qaammat kingulleq aamma taama iliorpugut. Sapaatip akunnerata siuliani aamma immitsinnut taama aperivugut.
AAMMA ATUARUK Nuuk Marathon annikillisamik pisussanngorpoq
- Nammineq kajumissutsimik suliaqarluta arpatsitsisartuinnaavugut, arpattartullu nammineq kajumissutsiminnik peqataasartuupput, aningaasatigullu taperserneqartigata iliuuseqarsinnaanngilagut.
Qanormi aappaagu iliussavisi?
- Aappaagu uteqqilluassaagut. Nuannatingaassaagut. Maannali qasukkalaannguatsiarpunga. Ukioq manna allamik iliuuseqarsinnaanngilagut.
Arpannissamut peqataaniarlutik nalunaarsimasut tamarmik peqataanissaminnut akiliutaat utertinneqassapput.
Halvmarathonimut peqataanermi 200 koruuni akiliutaasarpoq, akisuumillu marathonimut peqataaneq 300 koruuniusarpoq