Nuuk Kunstmuseum-ip Pia Arke-p qalipagai 15-it pisiarai: Takorluugaq piviusunngorpoq

Kalaallit qallunaallu nunasiaataanerup nalaani oqaluttuassartaa illuatungeriinniit isigalugu, Pia Arke assilialiortarpoq. Ungasinngitsukkut taakkua Nuuk Kunstmuseum-imi takuneqarsinnaalissapput.
Nuuk Kunstmuseum-imi pisortaq, Nivi Christensen.Ass.: KNR Assi © : KNR
oktobarip 15-at 2021 15:52

Affarmik kalaaleq affarmillu qallungaaq assilialiortartoq, Pia Arke, Ittoqqortoormiini inunngortoq, 2007-mi 49-nik ukioqarluni toquvoq.

Taassumali suliai iikkani suli uumapput. Inuunuunermini sivisunermik Danmark-imi najugaqarpoq, nunanili assigiinngitsuni saqqummersitsisarnikuulluni. Assilialiaasa ilisarnaatigaat, nunasiaataanerup nalaani pissutsit.

Ulluni makkunani Nuuk Kunstmuseum-imi nuannaartunnguaqarpoq. Katersungaasivimmiit takorluuinjnarnikuusarput ungasinngitsukkut piviusunngorpoq, katersungaasiviup pisortaa Nivi Christensen oqarpoq.

Sapaatimmi akunnerani kingullermi katersungaasivik nalunaarpoq, eqqumiitsuliortup affarmik kalaallip affarmillu qallunaap Pia Arke-p assilialiai 15-it pisiarisimallugit.

- Soorlu takorluugaq piviusunnguinnartoq. Taassuma suliai ukiuni kingullerni qulini Danmark-imi katersungaasiviit angisuut arlallit nunanilu avannarlerni eqqumiitsulianik katersungaasiviit pisiariortornikuuaat.

AAMMA ATUARUK TUPILAKOSAURUS Nuummi tallimanngorpat saqqummersinneqalissaaq

- Amerikamiut katersungaasiviisa angisuut aamma taassuma suliai pileritsaattalerpaat. Taamaammat ukiut ingerlaneranni pisiariuminalliartuinnarput. Taamaammat taassuma suliai amerlaqisut Nunatsinni pissutsinik takutitsisut, pigilerneri eqqissiallannarpoq. Ukiut tallimat utaqqisimasuugutta, pisiarinissaannut periarfissaqassasoq ilimaginngilara. Taamaammat maanna pisiarisinnaaneri eqqissiallaataaqaaq, Nuuk Kunstmuseum-imi pisortaq, Nivi Christensen, oqaarpoq.

 

Qanganisarpalaartumik saqqummersitaq TUPILAKOSAURUS: Pia Arke-p eqqumiitsuliornermik,inuiaassutsimik nunasiaataanerullu oqaluttuarisaaneranik saqqummersitaq, ilaatigut Nuummi 2010-mi saqqummersinneqarpoq.  

Taamaammat taassuma suliaasa Nunatsinniinnissat pingaartuuvoq.

- Pia Arke tamatigut kalaallit qallunaallu akornanniittutut imminut isigisarpoq. Nunat marluk akornanniittutut. Taamaammat nunani taakkunani arlalinni suliaasa inissinnissaat pissusissamisoorpoq.

- Suliaasa ilaat Kalaallit Nunaanniinngippata tamanna pissusissamisoornavianngilaq, taamaammat oqarsinnavugut suliai angerlamut utertut. Arlaannaalluunniit maani pigineqanngitsuuppat tamanna eqqumiissangaluarpoq.

Danmark-imiit annertuumik tapiinerup ajornarunnaarsippaa

Ny Carlsbergfondet-imiit annertuumik tapiinikkut Nuuk Kunstmuseum-ip Pia Arke-p suliai 15-it pisiarisinnaalerpai.

Assilialiat taakkua amerlanersaat maanna Danmark-imi katersungaasivinni saqqummersinneqartarpuq, aatsaallu 2022-p naalernerani Nuummut tikiunneqassallutik.

- Suliaasa ilai ataasiakkaat saqqummersitanut ilaanngitsut siusinnerusukkut Nuummut tikissapput. Ukiup naalernerani imaluunniit upernaamut taakkua saqqummersinneqarnissaat neriunarpoq.

Pia Arke 2007-mi kræft-erluni toquvoq.

Pia Arke-p anaanaa kalaaliuvoq ataataalu qallunaajulluni. Pia Danmark-imi Kunstakademi-mi ilinnartuunikuuvoq, eqqumiitsuliornerullu oqaluttuarisaaneranut atatillugu cand.phil-inngorluni.