ASSIT Nuuk katersugaasivittaassaaq

Katersugaasivik Nuutoqqami amutsiviusimasup illutaaniissaaq. Inillu piareersarlugit qaammatini kingullerni annertuumik nutarterneqarsimapput.

Katersugaasivik taaguuteqassaaq Nuutoqaq - Nuummi Katersugaasivik, inillu nutarterneqaqqammersut Peqatigiiffik Nuummi Eqqaamasanut qanittukkut alakkartertinneqarput.

Peqatigiiffiup suliniutaasoq iluarisimaarpaa:

- Init periarfissagissaarput pitsaallutillu. Peqatigiiffiup suliaqarnerani aaqqissuussanik ingerlatsinissaq periarfissaalissaaq, tassa maannamut periarfissaasimanngikkaluartunik ingerlatsisinnaalissagunarpoq. Inini periarfissat Nuummi oqaluttuarisaanermik soqutigisalinnut kajumissaataassapput suliaqalernissamut, Ole Christiansen, Peqatigiiffik Nuummi Eqqaamasaneersoq taama oqarpoq.

Kommuneqarfik Sermersuumi borgmesterip Asii Chemnitz Narupip katersugaasivissaq Nuummi kulturikkut oqaluttuarisaanerup soqutigineqarneranik annertusaaniassamut atorneqassasoq oqaatigaa.

- Katersugaasivissaq illoqarfiit pingaarnersaata ullumikkut qangalu ineriartorneranik takutitsisuussaaq ilisimaneqarluartoq ataqqinartorlu, Asii Chemnitz Narup taama oqarpoq.

Nuutoqaq – Nuummi Katersugaasivik maajip naanerani ammarneqarsinnaassasoq Kommuneqarfik Sermersuup naatsorsuutigaa.