Nuuk ivigaaraasanik sanaamik arsaattarfiliassamut aningaasaleereerpoq

Nunatsinni arsaattartut nunanut allanut unammisartuinut sungiusaasuusup, Jens Tang Olesenip, tallimanngormat radio aviisikkut ujartorpaa, nunatsinni ivigaaraasanik sanaamik arsaattarfeqalersinnaanera. Nunatta unammisartuinut sungiusaasoq utaqqeqqittariaqanngilaq.

Nuup Kommunea ivigaaraasat atorlugit arsaaffiliornissamut atatillugu aningaasanik 2,8 mio. kr.-nik immikkoortitsereersimavoq.

Amiialakatsertarnerit tungujornilersortarnerillu tassaapput Nunatsinni sioraaqqanik ujaraaqqanillu sanaanik arsaaffeqarnerup nassatarisartagai. Tamanna Nuup Kommuneata qanoq iliuuseqarfiginiarpaa, ivigaaraasat atorlugit arsaaffiliortitsiniarnermigut.

Kommunalbestyrelsep ataatsimiinnerani november 2005-mi taamaattumik arsaaffiliortitsinissaq akuersissutigineqareersimavoq. Maannamullu 2008-p tungaanut 2,8 mio. kr.-nik aningaasanik immikkoortitsisoqareersimalluni.

Suligassuartussanik politikerinik arsaattartullu sinniissuutitaannik pilersitsisoqareersimavoq – maannakkullu teknikkimut tunngasortai Nuup Kommuneani misissorneqaleruttorput.

- Ivigaaraasat atorlugit arsaattarfiliornissaq Nunatsinni siullerpaasussaavoq, taamaammallu nunanut allanut paasisassarsiortariaqarpugut qanoq sananissaanut tunngatillugu. Ilaatigut Danmarkimi siunnersuisartoqatigiit attavigisarpavut kiisalu Islandimi Norgillu avannaanut aamma siunnersortinniarluta attaveqartarpugut. Qulakkeerusupparpummi nunami issittumik silaannaqartumi arsaaffik ivigaaraasanik sananeqartussap atorsinnaasuunissaa, taamaattumik suna tamaat misissoqqissaarparput, teknikkimut tunngatillugu suliniummi pisortaasoq, Nuup Kommuneani Teknikkeqarnermut Ingerlatsivimmeersoq, Martin Sørensen tamma oqarpoq.

-Nunatsinni siallertarlunilu apinikkaarujussuuvoq apullu aalluni iminngoraangat taserlunngortut imaarsartariaqartarpavut, taamaattumik pisariaqarpoq immikkut ittumik allequtsersuinissaq, eqqarsaatersuuterpassuit ingerlappavut, suliniummi pisortaasoq taama oqarpoq.

Aalajangiivigineqareersimavoq arsaattarfissaq arsaattarfiit sananeqartartut kinguaavisa pingajorissagaat tippitaqartussaq plastikkinillu ivigaarartaqartussaalluni, gummi sioqqallu atorlugit aamma sanaajusussaalluni. Ineruni arsaattarfitsialaasussaassaaq, arsaq pinngortitami arsaaffittut assakaallunilu tammissarsinnaassaaq.