Nuuk: Inuusuttut LSD-mik atuisimanerup kingunerisaanik tarnikkut napparsimalersimallutik napparsimavimmi uninngasut
Kalaallit Nunaanni illoqarfiit pingaarnersaannut LSD eqqunneqarsimasoq, Kalaallit Nunaanni Politiit nalunaarutigivaat.
Inuusuttut Nuummi Dronning Ingrid Napparsimavissuanut aanngajaarniuummik atuereernerup kingunerisaanik tarnimikkut napparsimalersimallutik unissimasut, politiit tusagassiuutinut nalunaarumminni allapput.
LSD
LSD uanngaanniit naalisagaavoq Lyserg-Syre-Diethylamid.
Kemiskinit pinngortinneqartarpoq sakkortuumik aanngajaartitsisartoq. Aamma taaneqartarpoq "syre".
LSD kuseriarnertut, iisartakkatut pappialaaqqatullu - "allakkanut nipitittakkatut" tuniniarneqartarpoq.
Annikitsuaqqamilluunniit atuinermi atuisup malugisaatai - annikitsumik annertuumilluunniit sunnerneqartarput.
Ilaannikkut atuisimanerup kingunerisaanik pissutsit piviusut qimanneqarsinnaasarput. Taanna taaneqartarpoq "trip".
Aanngajaarniut allakkanut nipitittakkatut iluseqarluni nunatsinnut eqqunneqarsimavoq. Tassa kipparissuaqqat pappiliaaqqatut nipitittakkatut isikkullit, allallit, qalipaatillit smiley-tallit.
- Kalaallit Nunaanni aanngajaarniut LSD atugaasoq siaruarsimasorlu politiit pasitsaassimanngilaat, inuusuttulli arlallit LSD-mik atuisuunerat misileraanerallu illuatungilersinnaanagu.
Maannakkullu politiit angajoqqaanut meeqqanullu akisussaasunut kaammattuipput, aanngajaarniutit sakkortuut atornerisa ulorianassusaa pillugu inuusuttut eqqartueqatigeqqullugit.
- Qanittumi assersuutinik takuvugut inuusuttut LSD-mik atuisimanerup kingunerissanik tarnikkut ajoqusersimanertik pillugu napparsimavimmut unittariaqarsimasut ikiortariaqarlutik. LSD-mik atuineq inuunermik kinguneqarsinnaavoq, taama ilisimatitsivoq Kalaallit Nunaanni Poiliini pisortap tullia, Viggo Johansen.
- Taamaammat maannakkut angajoqqaat meeqqanullu akisussaasut kaammattorpagut, aanngajaarniutit atornerisa ulorianassusaa pillugu inuusuttut eqqartueqatigeqqullugit.
Aanngajaarniutinik eqqussineq, paarisaqarneq tuniniaanerlu inatsisinik unioqqutitsinerusut, Viggo Johansen naqissusiivoq.
