Nuuk inoqarfik immiikkoortoq
Kommunit aaqqissuuteqqinnissaannut namminersornerullutik isumalioqatigiissitaat ippassaq tusagassiorfinnut katersortitsigamik nalunaarutigaat siunnersuusiaminni A siunnersuutiginiarlugu.
Isumalioqatigiissitat A-mi siunnersuutigaat nunarput inoqarfinnut sisamanut agguataarneqassasoq.
Siunnersuutigineqartumi maluginiagassaavoq Nuuk immikkoorluni inoqarfinngussasoq, sinnerilu ima agguataarneqarput. Avannaa Qaanaamiit Kangaatsiaq ilanngullugu inoqarfinngortinneqassasoq, kujataanilu Paamiuniit Nanortalik ilanngullugu aaqqiiffigineqassasut. Qeqqani inoqarfinngussapput Sisimiut maniitsoq Tasiilaq aamma Illoqqortoormiut.
Aaqqissuussaanermut isumalioqatigiissitani ilaasortaq Nukaaraq Eugenius oqarpoq kommuninut attuumassutillit innuttaasullu amerlanerit kissaataat malillugu killiffissarsiorluni taamannak siunnersuuteqarlutik.
Inoqarfiit agguataarnerini amerlaqatigiingajannik innuttaqarnissaat isumalioqatigiissitami nalilersimatgitsik, taannalu siunnersuut isumalioqatigiissitat isumaqatigiitut siunnersuutigigallaraat.
Nuummi kommunalit oqaloqatiginerani Nuummiut pingaartinniarsimavaat Nuuk illoqarfik pingaarnersaasiaqartoq, isumalioqatigiissitamilu nalilerneqarsimavoq suliassat namminersornerusuniit tigusassat tamakkerlugit Nuup nammassinnaagai, tassungalu peqqutaasoq Nuuk immikkut inoqarfinngortinneqassasoq.
Nukaaraq Eugeniussenip aamma oqaatigaa inatsisartut peqquneqassasut kommunit ukiut marluk ingerlanerani kikkunnut atassanerlutik nalunaarsimanngitsut inatsisiliuunneqassasut sumut atalersinnaanerannut pituttuisussamik. Aaqqissuussaanermut isumalioqatigiissitat nalunaarusiartik naalakkersuisunut septembarimi tunniutissavaat. Isumalioqatigiissitat Sisimiuni aqagu ataatsimiititsissapput, Tasiilarmiut Illoqqortoormiormiullu ataatsikkut sapaatip akunnerata tulliani ataatsimeeqatigineqassapput. Paamiormiut kangaatsiarmiullu kingusinnerusukkut ataatsimeeqatigineqarumaarput.
