Nuuk inissiaateqatigiiffiliulerpoq

Nuup kommunabestyrelsiata akuersineratigut kommunimit aqunneqartumik illuutileqatigiinnik pilersitsisoqarnialerpoq, inissianik aqutsisussanik. Inissiat pineqartut ullumikkut INI A/S-imit attartortinneqarput.

Nuummi inissiat pingajorarterutaat, tassa 1250-t missaat, uani pineqarput.

Nuup Kommuneata inissiat INI A/S-imit aqunneqarnissaat piumanagu taamatut aalajangiivoq.

Inissiat INI-p tigummiunnaarlugit kommunip tigummilerpagit attartortunut allannguuteqarnavianngitsoq, Nuup Kommuneani inissianut tunngasunik siunnersorti Erik Ravn oqarpoq, nangillunilu: - Ineqarnermut akiliutit taamaaginnassagunartut, aningaasartuutigisartakkat assingummata, Erik Ravn nassuiaavoq.

Kommunip illuutileqatigiiffia aktianik piginneqatigiiffittut ingerlassaaq, kommunimit pigineqarluni, kommunalbestyrelsillu siulersuisunut ilaasortassat toqqartassavai.

INI A/S-ip kommunillu akunneranni isumaqatigiissut ukioq naappat atorunnaassapput, taamaalippat illuutileqatigiiffiup nutaap inissiat aqutarilertussaallugit.