Nuuk Imeq sinneqartoorpoq

Nuuk Imeq ileqquusumik ippassaq ataatsimeersuarnermini, naatsorsuutit kusanavissut takutippaat, tassami 27,7 mio. kr.-nik, akileraarutit peereerlugit, siorna iluanaaruteqarput.

Immiorfiup sinneqartooraluarluni isertitamigut malugilluarsimavaa, Narsami Nuummilu immiorfeeraqalernera.

Nuuk Imeq-up immiaaqqat tunisai siornaammut naleqqiullugit 3,6 procentimik ikileriarsimapput, sodavandillu tunisat amerlassusaat allanngorpiarsimanatik.

Immiaaqqanik sodavandinillu tunisassiorfiup naatsorsuutigaa, siunissami unammillerneqarnertik suli annerulissagoq, tassami Namminersornerullutik Oqartussat puiaasanik utertitassanik aalajangersimasunik nunatsinni atuisoqassarnissaanik maleruaqqusaq allanngortissagaat ilimanarsimmat.

Nuuk Imeq-up erseqqissaatigaa, puiaasanik utertitsisarneq ingerlalluartoq, pinngortitamullu eqqaaginnarnissaraluamik pinaveersaartitsisoq.

2006-imi tunisat puiaasartaasa 98,4 procentii utertinneqarsimapput, tassa puiaasat 100-uugaangata marluginnaat utertinneqanngitsoorsimallutik.

Nuuk Imeq-up Narsami immiorfeeraq maanna suleqatigiseraa, Nuuk Imermi maqitsisalernissamut atatillugu, taamaalilluni aamma Narsami immiaaraliaq nunatta sinnerani tunineqarsinnaanngussammat.

Imeq nunatsinneersuunngitsoq puiaasanut ataasiartakkanut immiussaq nunatsinni ullumikkut tunisaasorujussuusoq illuatungilerniarlugu Nuuk Imeq imermik puiaasanut utertittakkanut maqitamik upernaamiit tuniniaasalissaaq.