Nuuk illoqarfik pingaarnersaq
Kommunit aaqqissuuteqqinnissaannut naalakkersuisut isumalioqatigiissitaat aalajangerput nunarput sisamanik kommuneqalissasoq imaluunniit namminneq taasimasamittut inoqarfinngussaaq.
Siunnersuutigineqartumilu Nuuk immikkoorluni inoqarfinngussaaq. Taamaasilluni paasinarsivoq Nuup kommunalbestyrelsiata kissaataa naalanneqarsimasoq,
Nuup borgmesteria Agnethe Davidsen isumalioqatigiissitat isummersimanerat pitsaalluinnarnerarpaa, pingaaruteqarmammi illoqarfeqassassoq pingaarnersamik. Nuummi naalakkersuisoqarfiuvoq, qitiusumillu sulliviit nuummiillutik.
Paamiut inoqarfimmut sorlermut ilanngutissanerluni suli ammaffigaa, maannalu aalajangerneqarallarpoq, kujataanut ilanngutsinneqassasoq, siusinnerusukkut oqallinnermi kujataarmiut oqaatigisarpaat kujataani kommunit imminnut qaninnerummata taakkuinnaasariaqartut, tassa Paamiut kujataanut ilaanngutsinneqassanngitsoq, Nuullu kissaaatigigaat kommunit kattussuunneqassappata Nuup avannaaniittut toqqarusunnerullugit, tassalu Paamiut Nuullu kattutissanngitsut.
Aaqqissuussaanermut ataatsimiititaliaq suli Paamiuni kommunalbestyrelsemik ataatsimeqateqanngilaq, Paamiullu borgmesteria IA-meersoq Lars Sørensen oqarpoq kissaatigalugu Nuuk Ivittuullu kommunalbestyrelsii ataatsimeeqatigiumallugit, Lars Sørensen aamma oqarpoq isumalioqatigiissitat siunnersuutaat ammaffigilluinnarlugu.
Nuup borgmesteriata ataatsimeeqateqarnissamik kissaat ilassilluarpaa, sulimi aalajangiussisoqanngimmat.
Paamiut Nuummut ilanngutinneqassanersoq borgmesterip eqqoriaruminaatsippaa, Paamiormiut isumaat suli ilisimannginnamiuk.
Aaqqissuussaanermut isumalioqatigiissitat suliatik naalakkersuisunut septembarimi tunniutissavaat. Inatsisartullu suliaq inaassavaat aamma kommunit sumut ilanngutissanersut nalornisut inatsisitigut pingitsaalillugit aalajangiiffigineqassasut isumalioqatigiissitat inassutigaat.
