Nuuk Film Festivalip pilersaarut Issittumi inuunermik sammisaqarfiusoq saqqummiukkaa
Nuuk International Film Festivalimi Erfalasutta qanoq pinngornera paasisaqarfigisinnaavat naggueqatigiilluunniit inuit Tartupalummi namminersortuunerat takorloorsinnaallugu.
Nuummi qulissaanik festivaleqarnera septembarip 16-iannit 19-iannut aaqqissuunneqassaaq.
- Ukiut qulissaanni festivaleqartitsinitsinni nalliuttorsiutiginninnissamut qilaarluinnarpugut, pilersaarummi Issittumi inuuneq aamma nunarsuarmi tamarmi nunat inoqqaavisa filmiliaat, ukiuni makkunani iluatsitsilluarfiusariaqartut sammineqassapput, festivalimi pisortaq, Pipaluk K. Jørgensen tusagassiuutinut nalunaarummi oqarpoq.
Festivalimi isiginnaagassiat Oscarimik nersornaaserneqarsimasut aamma Nunat Avannarliit Siunnersuisoqatigiivisa Isiginnaagassianut Nersornaasiinissaannut innersuunneqarsimasut isiginnaarneqarsinnaassapput.
Kalaallit filmiliaat pilersaarutini ilaasoq
Tamatuma saniatigut isiginnaagassiat arlallit nunatsinnut tunngassuteqartut isiginnaartinneqassapput.
Johannes Ujo Müllerip Erfalasutta qanoq pilersinneqarneranut tunngatillugu piviusuinnik tunngaveqartumik isiginnaagassiaata takutinneqaqqaarnera aamma isiginnaagassiaq piviusuinnik tunngaveqartoq, North of the Storm nunatta avannaani immap qaagut saarliusernermut tunngasoq ilaatigut isiginnaarneqarsinnaapput.
- Johannes Ujo Müllerip Erfalasorput pillugu isiginnaagassiaa nunatsinni takuteqqaarsinnaagatsigu aamma franskit isiginnaagassiaata Greenlandip nunatsinni immiunneqartup nunarsuarmi takuteqqaarneqarnissaa saqqummiussinnaagatsigu nuannaarutigaarput, Pipaluk K. Jørgensen oqarpoq.
Franskit isiginnaagassiaanni Aka Niviâna, Josef Tarrak, Nukâka Coster-Waldau, Paaliit Mølgaard Rasmussen, Paalu Jerimiassen aamma Rebbi Jørgensen isiginnaartitsisuni ilaatigut ilaapput, isiginnaagassiarlu taanna arnap qatanngutiminik Kalaallit Nunaanni periarfeerunneqartumik ujaasineranut tunngassuteqarluni.
Festivalimi Joachim Trierip Oscarinnassutigisaa Affektionsværdi aamma Islandimiut isiginnaagassiaat The Love that Remains Nunat Avannarliit Isiginnaagassianut Nersornaasiinissaannut innersuunneqartoq aamma isiginnaarneqarsinnaassapput.
Kalaallit isiginnaagassiaannut ukiut pitsaasut
Nunarput filminstitutimik nutaamik siorna peqalerpoq.
Filminstitut kultureqarnikkut aningaasaqarnikkullu ineriartornermut ingerlatsiffiullunilu kalaallit nipaannut oqaluttuassaannullu nunatsinni nunarsuarmilu saqqummersitsiffiunissamut periarfissiissaaq.
Kalaallit Nunaanni Filminstitutip nunatsinni isiginnaagassianut piviusuinnik tunngaveqartunut 10 millionit koruuninik tapiissuteqarnissani neriorsuutigalugu aggustimi oqaatigaa.
- Nunatsinni piviusuinnik tunngavilinnik isiginnaagassiorsartarnermut nukittorsaanissamut oqaluttuarisaanermut periarfissiillunilu filmiliortartunut amerlanerusunut inuiaqatigiinnut, kulturitsinnut siunissatsinnullu pingaaruteqartunik oqaluttuarnissamik periarfissiivoq, Filminstituttip siulittaasua, Malik Kleist tassunga atatillugu oqarpoq.
Pipaluk K. Jørgensenip kalaallit filmiliortarnerisa ingerlaarfigisaat aamma nuannaarutigaa:
- Filmiliortarnerput nukittuneruleriartuinnavippoq, kalaallit filminstitutianik siorna pilersitsineq ineriartornitta nukittulluarneranut assersuutissatsialaavoq.
Nuuk International Filmfestivalertitsineq Katuami, Nuummi Katersugaasivimmi Ilisimatusarfimmilu aaqqissuunneqassaaq. Pilersaarutit festivalilu pillugit niff.gl-imi annerusumik atuagaqarsinnaavutit.
