Nuuk Climate days CO2-mik isumaqatiginniarnissamut tunngaviusinnaapput
- Soorunalimi ilisimatuut paasisimasaat silap allanngoriartorneranut tunngasut kiisalu pinngortitap allanngoriartorneranut tunngasut taakkua siullermik soqutiginarnerpaajupput. Pinngortitap allanngoriartorneranut tunngasunik ilisimatusarnerup sukkasoorujussuarmik allannguutinik malussartarnerat pissutigalugu. Nunatsinnut tunngatillugu pinngortitap allanngoriartornerata nutaanik uagutsinnut nassataqarnera pingaartuuvoq, aammalu siunissamut pilersaarusiornissatsinnut nutaanik tunisisuulluni, Kuupik Kleist oqarpoq.
Kalaallit Nunaata aatsitassarsiornermik ineriartortitsinissaanut atatillugu CO2-mik aniasitsisinnaanermut isumaqatigiinniartoqarnissaanut ataatsimeersuarnermi tunngaviusinnaasunik pissarsinissaq, Naalakkersuisut siulittaasuata Kuupik Kleistip neriuuteqarpoq.
- Nalunanngilluinnartumik ersersinneqartut ilagivaat, uumassusilinnik inuuniuteqarnermi periarfissat allanngoriartupiloortut aamma ilaatigut ajorsiartortut. Taamaattumik inuussutissarsiutinik allanik ujarlertariaqarnerput taanna qularnanngilaq. Taamaattumik inuussutissarsiutit nutaat, aatsitassarsiornermut tunngasut, CO2-mik aniasitsisartut tamakkua ujartuiffigissallugit pisussaavugut. Aningaasarsiornikkut siuariartussagutta. Tamanna ataatsimeersuarnerup taamaattup tunngavilersorsinnaavaa. Naalakkersuisut siulittaasuat Kuupik Kleist oqarpoq. Ilisimatuut nunani tamalaaneersut katillugit 160-it sinneqartut silap pinngortitallu allanngoriartortup misissuiffiginerani paasisatik pillugit Katuami augustip 27-ata tungaanut saqqummiisaqattaassapput. Ilisimatuut saqqummiisartussat amerlagaluartut piniartut avanersuarmeersut marluk, Lars Jeremiassen aamma Hans Jensen, ullaaq ammaanermut atatillugu saqqummeeqataapput, taakku sikup piniartuunermut kiisalu aalisartuunermut sunniineri pillugit assitalersuillutik oqaluttuarput.
- 1980-ikkut naalernerani sikup issussusaa uanga takissusera sinnerlugu, tassa 2 meterit sinnerlugit issussuseqartarpoq. Massakkullu siku takissusima affaannaanik takissuseqartarluni. Tassa 80-ikkut naalernerani tummeqqilluta aatsaat siku putunialuttarsimagaluarparput, tasamunga aalisarfinnut qaleralinniarfinnut. Massakkullu qiteqqutiinnarluta issussuseqalersimalluni. Avanersuarmi piniartut oqaluttuarput.
