Nuuk Centerissaq suli naammaassineqanngilaq
Nuuk Centerissamit inuit sullisillit matumit isertarlutillu anisartut imaaginnavipput, pisinniarfissarsuarmi sapaatip akunneri marluk qaangiuppata ammarneqartussaavoq.
Tamannalu pitsinnagu qalipaasut, sanasut, pisinniarfiuteqartullu nalunaaquttap akunneri amerlasuut atorlugit sulisussaassapput. Pisinniarfiimmi piareertussaapput, elektikerillu suliassatik kingulliit suliarissavaat, taamalu pisinniarfissuaq tamakkerlugu eqqiaasoqarumaarpoq. Pisinniarfisuullu suli piariivinnginnera pisinniarfiutilinnut uippakajaarutaanngilaq.
- Matukkut isilaarluni naammassineqanngisutut isikkoqaraluartoq taamaattoq, pilersaarutit malillugit ingerlasoqarpoq. Qilanaarutigeqarpullu pisinniarfitta nutaap, kusanarluinnartullu pisisartutsinnut takutsinnissaa. Pisinniarfissarsuarmilu pisinniarfeqarnissatsinni pisinniartartutta sulisullu attaveqarluarnissaannik pilersaaruterput iluatsissinnaanngussavarput, Per Steen Larsen Pisiffik A/S-imi allaffissornermi direktøri taama oqaluttuarpoq.
Pisinniarfissarsuarmi attartortussat pisinniarfissaminni nutaami aningaasarpassuarnik atuisimapput. Pisiffik A/S-miilli aningaasat qanoq amerlatigisut atorneqarsimaneri oqaatigineqarusunngikkaluartoq, taamaattoq Pisiffik A/S-imi allaffisornermi direktørip aningaasat qulingiluanik kisitsisitaqartut atorneqarsimanerarpai.
- Pisinniarfissatta qanoq isikkoqarnissaa isiginiarnerusimavarput, aningaasallu qanoq amerlatigisut atorneqassanersut apeqqutaatippallaarsimanagu. Ilisimaneqarpormi pisisartut pisinniarfiit qanoq isikkoqanerinit isiginiagaqartartut, taamaallillutillu nakerinerusaminnut pisiniartartut. Massakkorpiaq allaffimma saani issiaannarnissara ajornakusoortittorujussuuara, pisinniarfissatsinnilu ineriartorneq malinnaaffigerusunnerullugu. Tallimanngornermi juulip 27-ani pisinniarfissuup ammaanersiorneqarnerani piariivissimassaagut, Per Steen Larsen qungujulluni taama naggasiivoq.
