Nuuk Centerip matugallarneqarnera aningaasaqarnikkut kingunerlutitsivoq
Sapaassuit qanilliartornerini pisiniarfiit inoqartaqisut matoqqagallartinneqarnerat aningaasaqarniarnikkut malunnaataassasoq naasuerniamit, atisaarniarmit Pisiffimmiillu oqaatigineqarpoq.
- Sunniuteqartorujussuuvoq, ingammik massakkut 1. Adventertussaagami sapaatiuppat, taavalu suliassarpassuagut ullumi naammassisussaagaluakkagut naammassinngitsoorpagut, taavalu inuit bestiiliinikut tigusinnaajunnaarnikuuvaat bestiilikkatik, tassuuna aamma annaasaqarpugut aningaasatigut, Ivalu Duelund Qvistgaard naasuerniarfimmik IQ Naasut-mi piginnittoq oqarpoq.
Aamma atuaruk VIDEO & ASSIT Namminersorlutik Oqartussanut sioorasaarinermi ima pisoqarpoq
Aamma niuertarfissuaq Pisiffik eqqugaavoq.
- Matoqqatinneqarallarnitsinni aningaasatigut annaassagut eqqaassanngikkaanni aamma nerisassarpassuit eqqartariaqarsimavagut, Pisiffimmi pisortaanerup allattaa, Lena Lauridsen oqarpoq.
Aamma atuaruk Politiit upalungaarsimanertik taamaatippaat
Sioorasaarisoqarnerata kingorna niuertarfinnit qimarngussuisitsineq sukkasuumik ingerlasimasoq, atisaarniarfimmi ITTU-mi pisortaq, Annemarie Hviid Kristensen oqarpoq.
- Sulisut katersorpagut, matut tamaasa matoortitserlugit, pisiniarfiup iluani pisiniaqarnersoq misissorparput, matulu parnaapallariarlugu anivugut, tamanna minutsialunnguit ingerlanerinnaani pivoq, Annemarie Hviid Kristensen oqarpoq.
Aamma atuaruk Politiit ittuat: Parisimi pisut sakkortuumik qisuariarnitsinnut peqqutaapput
Politiit ullup ingerlanerani nalunaarutigaat pasisaq tigusarineqartoq, inullu taanna tarnimigut napparsimasuusoq nalunaarutigalugu, taamatullu napparsimmavimmi paaqqutarineqartoq oqaatigalugu.
Politiit suliaq sukkasuumik pitsaasumillu ingerlassimagaat ITTU-mi pisortap oqaatigaa.
- Toqqissisimanarpoq pisoq asuliunngitsumik suliarimmassuk. Nalunaqaarmi, inuit tarnimikkut napparsimasut taama iliorpata, aamma qununartutut isigineqarsinnaagami, ITTU-mi piniarfiup pisortaa, Annemarie Hviid Kristensen oqarpoq.