Nuuk amerikamiup (annuttup) isaaniit

Andrew Quinn nunarsuarmi nutaarsiassaqartitsiviit annersaasa ilaanni Reutersimi tusagasiortuusoq,
kalaallit alakoortut, pinngortitaq pinnersoq Thailandimiullu atoqatigiittunik isiginnaagassiaat pillugit, nittartakkamini allattarfimmigut - bloggimigut - takkajaarsuarmik allaaserisaqarpoq.

Bloggini apeqqummik aallarnerpaa: "Nuuguna sumiittoq aamma soormiuuna  tassunnartoqarsimasoq?". Allaaserinnermini maannannginnissamut pissutissanik tunngavilersuivoq - aammali mannaqqinnissamut tunngavilersuuteqarluni.

Imigassamik aalakoornartulimmik atuineq nuannarinngivippaa:

"Nuummi immiorfiliarpugut, tassanilu takuarput, inuit piffissamik annersaa sumut atortarneraat. Tassalu imernermut. Inuit ingasalluinnartumik  amiilaarnartumillu aalakoorput, Andrew Quinn allappoq.

Nuummili unnuakkut ornittassat nuannarinngilluinnariarlugit, Hillary Clinton  ministerillu allat malinnaaffigalugit Sermitsiap eqqaanut aqagukkut angalaarneq nuannarilluinnarpaa. "Nalunaaquttap akunneri marluk eqqaasassaqarnarluinnartut", Andrew Quinn allappoq.

Nuulli ataatsimut isigalugu orpeqarani nikallunganartut isigaa. Aammali illoqarfiup ilaanik pinnersoqarpoq - illutoqqat qorsungasunik qalipaatillit taavai.

Taava neriniartarfik, Thailandimiut nerisassaataannik Nunatsinni kisiartaalluni sassaallisaartutut isumaqarfigisani, Andrew Quinnip oqaluttuaraa. Andrew Quinn isumaqarpoq, taanna ateqartoq Thai Porn -  kalaallisuunngoraanni Thailandimiut atoqatigiittunik isiginnaagassiaannik paasineqartariqartoq. Neriniartarfiup aterpiaraa Charoen Porn.

Bloggimi allaaserisat naalakkersuinikkut pissutsinik nutaartaqanngillat, Issittumili Siunnersuisoqatigiit Issittumi nunat maannakkumuungallartoq  pimooruterujussuarnagu suleqatigiinniarfiattut taavaa.

Taava aamma Andrew Quinnip allaaserisaa naapertorlugu, Clintonip tikinnissaa nalorninarsimavoq. Tassamigooq Nuup silaa Amerikamiut timmisartuisa minnissaannut pitsaanerpaanngimmat.

Nittartakkakktu allagaq uani atuarsinaavat: www.quinntelligence.com