Nuuk akikinnerpaassaaq
Misissueqqissaarnerup kingorna nalunaarusiaq sakkutuu qullersaqarfiannit suliarineqarpoq, Issittumilu Sakkutooqarfiup sumi inissisimanissaanut aalajangiinissami tunngavigineqassalluni.
Nalunaarusiami naatsorsuinerit najoqqutaralugit Issittumi Sakkutooqarfik Nuummi inissinneqassappat aningaasat sipaarutissat ukiumut 49 aamma 52 millionit koruunit akornanniissapput, Narsarsuarmiissappat sipaarutissat 43 millionit koruuniussallutik, sakkutooqarfillu Kangilinnguaniiginnassappat 11 millionit koruuniussallutik.
Tamatuma saniatigut sanaartukkanut aningaasaliisoqartariaqassaaq, tamatumanilu Kangilinnguit aningaasartuutikinnerpaaffiussaagaluarpoq tassani sanaartornissamut 59 millioner koruunit pisariaqartinneqassammata. Nuummi Narsarsuarmilu sanaartornissamut 122 millioner koruuni pisariaqartinneqassapput. Taamaattorli sanaartukkanik Nuummi attartortoqarsinnaassappat akikillisaataangaatsiassaaq.
Nalunaarusiami aamma arlalitsigut eqqaaneqarput Nuummi inissiinissap pitsaaqutai.
Aningaasalli kisimik apeqqutaanngillat. Nalunaarusiami isiginiarneqartariaqartut allat eqqarsaatigineqartariaqartut aamma taakkartorneqarput.
Soorlu qitiusumik allaffeqarfiup ingerlanneqarnissaanut tunngasut. Matumani Nuuk inissisimalluarneruvoq, Kangilinnguimmi periarfissanik assigiinngitsunik pilersitsinissamut pisariaqartitsimmat, soorlu nalunaarusiami allassimasoq. Aamma Nunatsinnut Nunatsinnillu angalaniartunut Nuuk periarfissarissaarnerpaavoq. Matumani pisortaqarfinnik suleqateqarnissamut periarfissat ilanngullugit.
Nalunaarusiami sakkutooqarfiup inissisimaffissaatut arlaannaalluunnit piukkunnarnerusutut tikkuarneqanngilaq. Tamatumami aalajangiiffiginissaa qinikkat ukiaru aalajangiiffigisussaavaat.
