Nuuk Adventure Race aasap ulluisa kingullersaanni ingerlanneqassaaq

Iliigiikkuutaani arpattartoqarlunilu sikkertartoqassaaq. Kina sikkilertuussanersoq, qanorlu sivisutigisumik, peqataasut nammineq aalajangigassaraat. Sikkilertoqaannarnissaali arpattoqaannarnissaalu piumasaqaataavoq. Ullormi unammiffissami aqqut ingerlaarfissaq aatsaat saqqummiunneqassaaq, taamaammat peqataasunut tupaallannartunik aqqusaagassaqassajunnarsivoq.

Nuuk Adventure Racertoqarnerani peqataasut ingerlaarnerminni assigiinngitsutigut unammillerneqartassapput. Taakkulu ingerlaarfimmi ingerlattassavaat, aaqqissuisullu peqataasunik sunik unammillerneqassanersut oqaatigerusunngilaat.

Immikkoortunut peqataaffigineqarsinnaasut pingasuupput. Arnaannaalluni, angutaannaallu imaluunniit arnat angutillu akuleriissillugit ingerlaarnerit. Iligiikkuutaanut peqataaniarluni akiliut 400 kr.-iuvoq, nalunaarfissarlu kingulleq tassaavoq arfininngorneq aggustip 24-iani 2013.

Peqataasut nammineerlutik nassassaavaat sikkili niaqorornaveeqqullu. Ingerlaarfimmi imertugassaqarlunilu naatitartugassaqassaaq. Nerisassat allat peqataasut nammineerlutik isumagissavaat.

Ingerlaarneq akunnerit marluk sisamallu akornanni ingerlanneqarsinnaassasorineqarpoq. Ingerlaarnissamut piffissaliussaq tassaavoq nalunaaquttap akunneri arfinillit, aaqqissuisut nalunaarput.

adventureracenuuk@gmail.com-imut peqataaniarluni nalunaartoqarsinnaavoq.

Iligiikkuutaanut peqataaniarluni akiliut kontumut reg 6471 konto 5273533 akilerneqassaaq, atillu allannissaa eqqaamaneqassaaq. Akiliineq nalunaarsorneqareerpat aatsaat peqataanerup atuutsinneqassasoq maluginiaqquneqarpoq.

Uani allanik atuagassaqarpoq: https://www.facebook.com/NuukAdventureRace