Nuup ilaani Nuussuarmi Paarnani aqqusineq assersorneqarpoq.Assi: Signe Haahr

Nuuk: 36-nik ukiulik tigusarineqarpoq politiinullu siorasaarisimasutut pasineqarluni

36-nik ukiulik inissiamiinnermini politiinut allaammik siorasaaruteqarpoq. Politiit inissiamut gassimik qulliliornartumik seqqorput angullu tamatuma kingorna tigusaralugu.

Nuummi ulorianartoqarsinnaanera maanna qaangiuppoq, angullu 36-nik ukiulik politiinit tigusarineqarluni.

Kalaallit Nunaanni Politiit taama nalunaaruteqarput.

Pisoq politiit ualimullu suliaqarfigisaat Nuummi Nuussuarmi pivoq.

Suliaq 36-nik ukiullip inissiamiittup politiinut aallaammik siorasaaruteqarneranut tunngassuteqarpoq. Politeeqarfiup angut nalunaaqutaq 17.30-p missaata tungaanut eqqissisarniarsarigaluarpaa.

Tamannali iluatsinngimmat 36-nillu ukiulik siorasaarutiminik ilumoorussissaguni inunnut allanut navianartorsiortitsisinnaammat politiit angutip inissiaata nalaani isumannaallisaaniarlutik aallartipput.

AAMMA ATUARUK Nuummi politiit: Inuk inissiamiittoq allanut navianartoq - Paarnanukartoqassanngilaq

Angutip inissiamit anisinniarnissaa pissutigalugu politiit inissiamut gassinik qulliliornartunik sisamariarlutik seqqorput, nalunaaqutarlu 21:26 angut tigusarineqarlunilu politiinut siorasaaruteqarsimasutut pasineqartoq suliaqarnermi aqutsisup nalunaarutigaa.

Angut politiinit siornatigut ilisimaneqareerpoq.

Angut 36-nik ukiulik inatsit tunngaviusoq naapertorlugu killisiorneqassanersoq maanna nalilersuleruttorpaat.

Kalaallit Nunaanni Politiit Nuummi ulorianarsinnaasumik pisoqarsinnaanera unitsippaat, sumiiffimmilu assersuineq unitsinneqarluni sumiiffimmi toqqissilluni ingerlaartoqaqqissinnaalerpoq.

Kalaallit Nunaanni Politiit innuttaasut isersimaannarnerannik qujassuteqarfigaat.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl